അഫ്ഗാനിസ്ഥാനില്‍ ഭീകരാക്രമണം; രണ്ട് പേര്‍ കൊല്ലപ്പെട്ടതായി റിപ്പോര്‍ട്ടുകള്‍

അഫ്ഗാനിസ്ഥാനിലെ കാബൂളില്‍ ഭീകരാക്രമണം. ഐഎസ് ഭീകരര്‍ എന്ന് സംശയിക്കുന്നവര്‍ വെടിയുതിര്‍ക്കുകയായിരുന്നു. സംഭവത്തിൽ രണ്ട് പേര്‍ മരിച്ചതായി റിപ്പോര്‍ട്ടുകള്‍ പുറത്ത് വന്നു. കാബൂളിലെ കാര്‍ട്ടെ പര്‍വാന്‍ ഗുരുദ്വാറിലാണ് സംഭവം നടന്നത്.

സംഭവത്തില്‍ ഇന്ത്യ ആശങ്ക അറിയിച്ചു. സ്ഥിതിഗതികള്‍ വിലയുരുത്തുകയാണെന്ന് ഇന്ത്യന്‍ വിദേശകാര്യ മന്ത്രാലയം അറിയിച്ചു. ഐ എസ് ഭീകരരാണ് ആക്രമത്തിന് പിന്നിലെന്നാണ് പ്രാഥമിക വിവരം. ഈ മാസം പതിനൊന്നും കാബൂളിൽ ഈ പ്രദേശത്തിനടുത്ത് സ്ഫോടനം നടന്നിരുന്നു. അന്ന് പതിനൊന്ന് പേർക്ക് പരിക്കേറ്റിരുന്നു.

യാതൊരു പ്രകോപനവുമില്ലാതെ ഭീകരര്‍ വെടിയുതിര്‍ക്കുകയായിരുന്നു. സംഭവ സ്ഥലത്ത് സ്‌ഫോടനങ്ങളും നടന്നതായും റിപ്പോര്‍ട്ടുകളുണ്ട്. മരണസംഖ്യ സംബന്ധിച്ച് കൃത്യമായ വിവരം ലഭിച്ചിട്ടില്ല. താലിബാന്‍ സൈന്യവും ഐഎസ് ഭീകരരും തമ്മില്‍ ഏറ്റുമുട്ടല്‍ തുടരുന്നതായാണ് റിപ്പോർട്ടുകൾ.

Content Highlights – Afghanistan, IS terrorists, Two people killed