ടേക്ക് ഓഫിന് ശേഷം പി വി ഷാജികുമാര്‍ വീണ്ടുമെത്തുന്നു;
National Desk
Posted On February 24, 2024
30 വര്‍ഷങ്ങള്‍ക്കു മുന്‍പ് നടന്ന ബദിയടുക്ക, ദേവലോകം ഇരട്ടക്കൊലപാതകം വെള്ളിത്തിരയിലേക്ക്. ഇരട്ടക്കൊലയുടെ പശ്ചാത്തലത്തില്‍ പി.വി.ഷാജികുമാര്‍ എഴുതിയ ‘സാക്ഷി’ എന്ന ചെറുകഥ അടിസ്ഥാനമാക്കിയാണ് ചിത്രം ഒരുങ്ങുന്നത്. ടേക്ക് ഓഫ് എന്ന ഹിറ്റ് ചിത്രത്തിന്റെ രചയിതാവു കൂടിയായ ഷാജികുമാര്‍ തന്നെയാണ് സാക്ഷിയുടെ തിരക്കഥയും രചിക്കുന്നത്. മിഥുന്‍ മാനുവല്‍ തോമസിന്റെ അസോസിയേറ്റ് ആയ രാഹുല്‍ ആര്‍. ശര്‍മ സംവിധാനം ചെയ്യുന്ന ചിത്രത്തില്‍ അജു വര്‍ഗീസ് നായകനാകും.
പൂവന്‍ കോഴി സാക്ഷിയായ അസാധാരണ കേസായിരുന്നു ബദിയടുക്ക ഇരട്ടക്കൊലപാതകം. നിധി കുഴിച്ചെടുത്ത് നല്‍കാമെന്ന് പറഞ്ഞ് വിശ്വസിപ്പിച്ച് മന്ത്രവാദം നടത്തിയശേഷം ദമ്പതികളെ കൊലപ്പെടുത്തി 25 പവന്‍ സ്വര്‍ണ്ണവും പണവും കവര്‍ന്നെന്നായിരുന്നു കേസ്. കോഴിയെ വളര്‍ത്താത്ത വീടിനുള്ളില്‍ പൂവന്‍ കോഴിയെ കണ്ടെത്തിയതായിരുന്നു കേസില്‍ നിര്‍ണ്ണായക തെളിവായത്. ഇതേത്തുടര്‍ന്ന് കോഴിയെ ദൃക്‌സാക്ഷിക്ക് തുല്യമായ തെളിവായി പരിഗണിച്ചു. ഈ സംഭവത്തിന്റെ പശ്ചാത്തലത്തിലുള്ള ചിത്രം കോമഡി ഇന്‍വെസ്റ്റിഗേഷന്‍-ബഡ്ഡി കോപ്പ് ജോണറിലാണ് ഒരുങ്ങുന്നത്.
ചെറുകഥയ്ക്ക് കേന്ദ്ര, കേരള സാഹിത്യ അക്കാഡമി പുരസ്‌കാരങ്ങള്‍ നേടിയിട്ടുള്ള ഷാജികുമാര്‍ കന്യക ടാക്കീസ്, പുത്തന്‍ പണം, ടീച്ചര്‍ തുടങ്ങിയ ചിത്രങ്ങളുടെ രചയിതാവു കൂടിയാണ്. കാസര്‍ഗോഡും മംഗലാപുരവും പശ്ചാത്തലമാകുന്ന ചിത്രത്തിന്റെ ഷൂട്ടിംഗ് ഉടന്‍ ആരംഭിക്കും. ചിത്രത്തിന്റെ ഛായാഗ്രഹണം മൈക്കിളും എഡിറ്റിംഗ് നിതീഷ് കെ ടി ആറും നിര്‍വഹിക്കുന്നു. മുഹമ്മദ് ഷാ നിര്‍മിക്കുന്ന ചിത്രത്തിന്റെ സംഗീത സംവിധാനം അരുണ്‍ മുരളീധരന്‍ നിര്‍വഹിക്കുന്നു
Trending Now
