പാലക്കാട് രാഷ്ട്രീയക്കൊല; എട്ടു പ്രതികള്‍ കസ്റ്റഡിയില്‍

പാലക്കാട് മരുതറോഡ് സിപിഎം ലോക്കല്‍ കമ്മിറ്റിയംഗം ഷാജഹാനെ വെട്ടിക്കൊലപ്പെടുത്തിയ കേസില്‍ എട്ടു പേര്‍ കസ്റ്റഡിയില്‍. മലമ്പുഴ കൊട്ടേക്കാട് സ്വദേശികളായ നവീന്‍ (28), സിദ്ധാര്‍ഥന്‍ (24) എന്നിവര്‍ നേരത്തെ പോലീസ് പിടിയിലായിരുന്നു. ഒളിവില്‍ കഴിയുകയായിരുന്ന മറ്റ് ആറു പേരെക്കൂടി പ്രത്യേക അന്വേഷണ സംഘം ചൊവ്വാഴ്ച വൈകിട്ട് കസ്റ്റഡിയിലെടുക്കുകയായിരുന്നു. മലമ്പുഴ കവ ഭാഗത്തു നിന്നാണ് ഇവരെ പിടികൂടിയത്.

പിടിയിലായവരുടെ വിവരങ്ങള്‍ പോലീസ് പുറത്തു വിട്ടിട്ടില്ല. നവീന്‍ കേസിലെ മൂന്നാം പ്രതിയാണ്. സിദ്ധാര്‍ത്ഥന്‍ അഞ്ചാം പ്രതിയാകുമെന്നാണ് സൂചന. കസ്റ്റഡിയിലുള്ള പ്രതികളെ ചോദ്യം ചെയ്തു വരികയാണ്. ഇവരുടെ അറസ്റ്റ് ബുധനാഴ്ച രേഖപ്പെടുത്തിയേക്കും. വിവരങ്ങള്‍ പൂര്‍ണ്ണമായും ശേഖരിച്ച ശേഷം മാത്രമേ അറസ്റ്റ് രേഖപ്പെടുത്തൂവെന്ന് ജില്ലാ പോലീസ് മേധാവി ആര്‍.വിശ്വനാഥ് അറിയിച്ചു.

ബിജെപി അനുഭാവികളായ എട്ടു പേര്‍ ഷാജഹാനെ വെട്ടിക്കൊലപ്പെടുത്തുകയായിരുന്നുവെന്നാണ് പോലീസ് എഫ്‌ഐആറില്‍ പറയുന്നത്. കൊലയ്ക്ക് കാരണം രാഷ്ട്രീയ വിരോധമാണെന്നും എഫ്‌ഐആറില്‍ വ്യക്തമാക്കിയിരിക്കുന്നു.

Content Highlights – Shajahan Murder Case, Eight Accused are in Custody