തൃശൂരില്‍ പേയിളകിയ പശുവിനെ വെടിവെച്ചു കൊന്നു

തൃശൂരില്‍ പേവിഷബാധയേറ്റ് അക്രമകാരിയായ പശുവിനെ വെടിവെച്ചു കൊന്നു. എച്ചിപ്പാറ ചക്കുങ്ങല്‍ ഖാദറിന്റെ പശുവിനെയാണ് കൊന്നത്. പേവിഷബാധ സംശയിച്ചതിനെത്തുടര്‍ന്ന് നിരീക്ഷണത്തിലായിരുന്ന പശുവാണ് ഇത്. തോട്ടത്തിലൂടെ അക്രമാസക്തമായി ഓടി നടക്കുകയായിരുന്നു പശു.

ഇതേത്തുടര്‍ന്ന് പോലീസ്, വെറ്ററിനറി, വനംവകുപ്പ് അധികൃതരുടെ സാന്നിധ്യത്തില്‍ പശുവിനെ വെടിവെച്ച് കൊല്ലാന്‍ തീരുമാനിക്കുകയായിരുന്നു. നടാമ്പാടം സ്വദേശി മനയ്ക്കല്‍ പാറു എന്ന അറുപതുകാരി ഇവിടെ പേവിഷബാധയേറ്റ് മരിച്ചിരുന്നു.

കണ്ണൂരിലും കഴിഞ്ഞ ദിവസം പശുവിന് പേവിഷബാധ സ്ഥിരീകരിച്ചിരുന്നു. ഇരട്ടക്കുളങ്ങര ഞാലില്‍ സ്വദേശിനി പി.കെ അനിതയുടെ പശുവിനാണ് പേവിഷ ബാധ സ്ഥിരീകരിച്ചത്. ഇതോടെ പശുവിനെ ദയാവധം നടത്താനും തീരുമാനിച്ചിരുന്നു.