നിങ്ങളുടെ സ്വർണ്ണത്തിന്റ പരിശുദ്ധി ഈ “എടിഎം” പറയും, സ്മാർട്ട് മെഷീൻ പുറത്തിറക്കി ദുബൈ

ഏറെ വർഷങ്ങൾക്ക് മുമ്പ് തന്നെ ശുദ്ധമായ സ്വർണ്ണക്കട്ടികളും നാണയങ്ങളും നൽകുന്ന എടിഎം പോലുള്ള വെൻഡിങ് മെഷീൻ ഉപയോഗിച്ച് ദുബൈ ചരിത്രം സൃഷ്ടിച്ചിരുന്നു. ഇപ്പോൾ നിങ്ങളുടെ സ്വർണ്ണം ശുദ്ധമാണോ എന്ന് പറയുന്ന എടിഎം പോലുള്ള ഒരു കിയോസ്ക് എമിറേറ്റ് കണ്ടുപിടിച്ചിരിക്കുന്നു.

സ്വർണ്ണാഭരണങ്ങളുടെ പരിശുദ്ധി ഒരു മിനിറ്റിനുള്ളിൽ പരിശോധിക്കാൻ പ്രാപ്തിയുള്ള പൂർണ്ണമായും പ്രവർത്തനക്ഷമമായ ലബോറട്ടറി യൂണിറ്റായി പ്രവർത്തിക്കുന്ന സ്വയം സേവന കിയോസ്‌ക് ആരംഭിച്ചു. ദുബൈ മുനിസിപ്പാലിറ്റിയാണ് ഈ സേവനം നൽകുന്നത്.

ദുബൈ വേൾഡ് ട്രേഡ് സെന്ററിൽ തിങ്കളാഴ്ച ആരംഭിച്ച ജി ടെക്സ് ഗ്ലോബൽ 2025 ലെ മുനിസിപ്പാലിറ്റിയുടെ സ്റ്റാൻഡിൽ ലോകത്തിലെ ഇത്തരത്തിലുള്ള ആദ്യത്തെ സംവിധാനം പ്രദർശിപ്പിച്ചു. ലോകത്തിലെ ആദ്യത്തെ “സ്മാർട്ട് ഗോൾഡ് ആൻഡ് ജ്വല്ലറി ടെസ്റ്റിങ് ലാബ്” എന്നറിയപ്പെടുന്ന ഈ പ്രോട്ടോടൈപ്പ്, വിലയേറിയ ലോഹ മേഖലയിലെ ഉപഭോക്തൃ സംരക്ഷണത്തിലും സേവനത്തിലും വലിയൊരു മാറ്റം ഉണ്ടാക്കുമെന്ന് പ്രതീക്ഷിക്കുന്നു.