സോണിയക്ക് 12.5 കോടിയുടെ ആസ്തി; 88 കിലോ വെള്ളി, ഇറ്റലിയില്‍ 27 ലക്ഷത്തിന്റെ സ്വത്ത്

രാജ്യസഭാ തിരഞ്ഞെടുപ്പില്‍ മത്സരിക്കുന്നതിന്റെ ഭാഗമായി ആസ്തി വെളിപ്പെടുത്തി കോണ്‍ഗ്രസ് മുൻ അധ്യക്ഷ സോണിയ ഗാന്ധി. ഇറ്റലിയില്‍ പിതാവിന്റെ സ്വത്തിലുള്ള 27 ലക്ഷത്തിന്റെ വിഹിതമടക്കമാണ് സത്യവാങ്മൂലത്തില്‍ വെളിപ്പെടുത്തിയിരിക്കുന്നത്.

88 കിലോ വെള്ളിയും 158 പവനോളം സ്വർണവും സോണിയയുടെ 12.53 കോടിയുടെ ആസ്തിയില്‍ ഉള്‍പ്പെട്ടിട്ടുണ്ട്. ഡല്‍ഹയിലെ ദേരാമണ്ഡിയില്‍ കൃഷി ഭൂമിയും സ്വന്തമായുണ്ട്.

എംപിയുടെ ശമ്ബളം, റോയല്‍റ്റി വരുമാനം, മൂലധന നിക്ഷേപം എന്നിവയിലൂടെയാണ് വരുമാനമെന്നും അവർ സത്യവാങ്മൂലത്തില്‍ വ്യക്തമാക്കി. പണമായി 90,000 രൂപയാണ് കൈവശമുള്ളത്. അഞ്ച് വർഷം മുമ്ബുള്ളതിനേക്കാള്‍ സോണിയയുടെ ആസ്തിയില്‍ കാര്യമായ മാറ്റമില്ല. 2019-ല്‍ 11.82 കോടി രൂപയുടെ ആസ്തിയായിരുന്നു അവർ വെളിപ്പെടുത്തിയിരുന്നത്.