പന്ത്രണ്ടു വയസുകാരിയെ തെരുവുനായ ആക്രമിച്ചു

രാവിലെ പാല്‍ വാങ്ങാന്‍ പോയ പന്ത്രണ്ടു വയസുകാരിയെ തെരുവുനായ ആക്രമിച്ചു. പത്തനംതിട്ട റാന്നി പെരുനാട സ്വദേശിയായ അഭിരാമിയ്ക്കാണ് പരിക്കേറ്റത്. കുട്ടിയുടെ കണ്ണില്‍ ഉള്‍പ്പെടെ ദേഹത്ത് ഏഴിടത്ത് പരിക്കേറ്റിട്ടുണ്ട്. ശനിയാഴ്ച രാവിലെയാണ് സംഭവം.

പെണ്‍കുട്ടി കാര്‍മല്‍ എഞ്ചിനീയറിംഗ് കോളേജ് റോഡിലൂടെ നടന്നു പോകുമ്പോഴായിരുന്നു തെരുവുനായ ആക്രമിച്ചത്. ആദ്യം കാലിനു കടിയേറ്റ കുട്ടി താഴെ വീണു. ഇതോടെ നായ വീണ്ടും ആക്രമിക്കുകയായിരുന്നു. കുട്ടിയുടെ കണ്ണിലും തോളിലും സാരമായി പരിക്കേറ്റു.

നാട്ടുകാര്‍ വിവരം അറിയിച്ചതിനെ തുടര്‍ന്ന് കുട്ടിയുടെ മാതാപിതാക്കള്‍ എത്തിയാണ് ആശുപത്രിയില്‍ കൊണ്ടുപോയത്. കുട്ടി ജനറല്‍ ആശുപത്രിയില്‍ ചികിത്സയിലാണ്. കണ്ണിനു സാരമായി പരിക്കേറ്റിട്ടുണ്ടെന്ന് ആശുപത്രി അധികൃതര്‍ അറിയിച്ചു.

Content Highlights – Street dog, attacked a girl