വീണ്ടും റെക്കോര്‍ഡ് ഇട്ട് സംസ്ഥാനത്തെ സ്വര്‍ണവില

തിരുവനന്തപുരം: സംസ്ഥാനത്ത് സ്വർണവില വീണ്ടും റെക്കോർഡ് നിരക്കില്‍. ഒരു പവൻ സ്വർണത്തിന് ഇന്ന് 1160 രൂപയാണ് വർധിച്ചത്.

ഇന്നലെ സ്വർണവില കുറഞ്ഞത് ഉപഭോക്താക്കള്‍ക്ക് പ്രതീക്ഷ നല്‍കിയിരുന്നു.അന്താരാഷ്ട്ര സ്വർണ്ണവില ഉയർന്നതോടെ ഇന്ന് വീണ്ടും വില കുത്തനെ ഉയർന്നു. ഒരു പവൻ സ്വർണത്തിന്റെ ഇന്നത്തെ വിപണി വില 52280 രൂപയാണ്.

യുഎസ് മാർക്കറ്റ് ഓപ്പണ്‍ ചെയ്തപ്പോള്‍ വില 35 ഡോളർ വർദ്ധിച്ച്‌ സ്വർണ്ണവില 2325 ഡോളറിലേക്ക് കുതിച്ചിട്ടുണ്ട്. ഇന്ത്യൻ രൂപയുടെ വിനിമയ നിരക്ക് 83.30 ആണ്. 24 കാരറ്റ് സ്വർണ്ണകട്ടിക്ക് ബാങ്ക് നിരക്ക് കിലോഗ്രാമിന് 74 ലക്ഷം രൂപയായി.

സ്വർണവില വർധിക്കാനുള്ള കാരണങ്ങള്‍ പരിശോധിക്കുമ്ബോള്‍, വർദ്ധിച്ചുവരുന്ന ഭൗമരാഷ്ട്രീയ പിരിമുറുക്കങ്ങള്‍ നിക്ഷേപകരെ സ്വർണം പോലുള്ള സുരക്ഷിതമായ നിക്ഷേപങ്ങളിലേക്ക് നയിക്കുന്നു. കൂടാതെ, ഈ വർഷം 50%ല്‍ അധികം ജനസംഖ്യ വരുന്ന രാഷ്ട്രങ്ങള്‍ തെരഞ്ഞെടുപ്പിലേക്ക് പോകുമ്ബോള്‍ അനിശ്ചിതാവസ്ഥ നിലനില്‍ക്കുന്നതും സ്വർണ്ണത്തിലേക്കുള്ള നിക്ഷേപം വർദ്ധിപ്പിക്കുന്നു. അമേരിക്ക പലിശ നിരക്ക് കുറയ്ക്കുമെന്ന വാർത്തകളെ തുടർന്നാണ് 1982 ഡോളറില്‍ നിന്നും ഉയരാൻ ആരംഭിച്ചത്.

സംസ്ഥാനത്ത് സ്വർണവില ഉയർന്നതോടെ ഇന്നത്തെ വില അനുസരിച്ച്‌, ഉപഭോക്താക്കള്‍ക്ക് ഒരു പവൻ സ്വർണം വാങ്ങണമെങ്കില്‍ ഏറ്റവും കുറഞ്ഞ പണിക്കൂലിയില്‍ 57,000 രൂപ നല്‍കേണ്ടിവരും.