‘അതിജീവിതയ്ക്ക് മാനഹാനി ഉണ്ടാക്കുന്ന രീതിയില്‍ പെരുമാറി’; സുരേഷ് ഗോപിക്കെതിരെ 180 പേജുള്ള കുറ്റപത്രം സമര്‍പ്പിച്ചു

മാദ്ധ്യമപ്രവർത്തകയോട് അപമര്യാദയായി പെരുമാറിയെന്ന കേസില്‍ നടനും ബിജെപി നേതാവുമായ സുരേഷ് ഗോപിക്കെതിരെ പൊലീസ് കുറ്റപത്രം സമർപ്പിച്ചു.

കോഴിക്കോട് ജെഎഫ്‌എംസി – 4 കോടതിയിലാണ് കുറ്റപത്രം സമർപ്പിച്ചത്. അതിജീവിതയ്ക്ക് മാനഹാനി ഉണ്ടാക്കുന്ന രീതിയില്‍ പ്രവർത്തിച്ചുവെന്നാണ് കുറ്റപത്രത്തിലുള്ളത്. കഴിഞ്ഞ മാസം 27ന് അന്വേഷണ സംഘം കോടതിയില്‍ കുറ്റപത്രം സമർപ്പിച്ചെങ്കിലും പിശക് കാരണം കുറ്റപത്രം തിരിച്ചയക്കുകയായിരുന്നു. പിന്നീട് പിശകുകള്‍ തിരുത്തി ഇന്ന് വീണ്ടും സമർപ്പിച്ചു. 180 പേജുള്ള കുറ്റപത്രമാണ് സമർപ്പിച്ചത്. യുവതിക്ക് മാനഹാനി ഉണ്ടാക്കുന്ന രീതിയില്‍ സുരേഷ് ഗോപി പെരുമാറിയെന്ന് കുറ്റപത്രത്തില്‍ പറയുന്നു.

കേസില്‍ ആദ്യം 354 എയും (ലൈംഗികാതിക്രമം) 1,4 എന്നീ ഉപവകുപ്പുകളുമാണ് ചേർത്തിരുന്നത്. തുടരന്വേഷണത്തില്‍ കൂടുതല്‍ വകുപ്പ് ചേർത്തത്. മാനഭംഗപ്പെടുത്തണമെന്ന ഉദ്ദേശത്തോടെ സ്പർശിക്കുന്ന കുറ്റത്തിനുള്ള 354 വകുപ്പും ചേർത്തു. കേരള പൊലീസ് ആക്‌ട് 119 എയും ചേർത്തിട്ടുണ്ട്.