നെറ്റ് പേപ്പര്‍ ചോര്‍ച്ച കേസ് അന്വേഷിക്കാന്‍ ബിഹാറിലേക്ക് പോയ സിബിഐ സംഘത്തിന് നേരെ ആക്രമണം

യുജിസി നെറ്റ് പേപ്പര്‍ ചോര്‍ച്ച കേസ് അന്വേഷിക്കാന്‍ ബിഹാറിലേക്ക് പോയ സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (സിബിഐ) സംഘത്തെ ബീഹാറിലെ നവാഡയില്‍ ഗ്രാമവാസികള്‍ ആക്രമിച്ചു. സംഘം വ്യാജമാണെന്ന് കരുതിയാണ് ഗ്രാമവാസികള്‍ ആക്രമിച്ചതെന്ന് ലോക്കല്‍ പൊലീസ് പഞ്ഞു.

ഇരുന്നൂറോളം പേര്‍ക്കെതിരെ പൊലീസ് കേസെടുത്തിട്ടുണ്ട്. ആക്രമണത്തിന്റെ ദൃശ്യങ്ങള്‍ മൊബൈല്‍ ഫോണില്‍ പകര്‍ത്തിയിട്ടുണ്ടെന്നും വീഡിയോയുടെ അടിസ്ഥാനത്തില്‍ പ്രതികളെ കണ്ടെത്തി വരികയാണെന്നും പൊലീസ് പറഞ്ഞു. നാല് പേരെ ഇതിനകം അറസ്റ്റ് ചെയ്തിട്ടുണ്ട്.

ആക്രമണം നടക്കുമ്ബോള്‍ സംഘം കാസിയാദി ഗ്രാമത്തിലായിരുന്നുവെന്ന് ലോക്കല്‍ പൊലീസിലെ മുതിര്‍ന്ന ഉദ്യോഗസ്ഥന്‍ അംബ്രീഷ് രാഹുല്‍ പറഞ്ഞു. ലോക്കല്‍ പൊലീസ് എത്തിയാണ് ഉദ്യോഗസ്ഥരെ രക്ഷപ്പെടുത്തിയത്. നാല് ഉദ്യോഗസ്ഥരും ഒരു വനിതാ കോണ്‍സ്റ്റബിളും അടങ്ങുന്നതായിരുന്നു സംഘം.