പാര്‍ക്കിലെ വേവ്പൂളില്‍ യുവതിയെ കയറിപ്പിടിച്ചെന്ന് പരാതി; കണ്ണൂരില്‍ പ്രൊഫസര്‍ അറസ്റ്റില്‍

വാട്ടർതീം പാർക്കിലെ വേവ്പൂളില്‍ 22-കാരിയെ കയറിപ്പിടിച്ചെന്ന കേസില്‍ കേരള കേന്ദ്ര സർവകലാശാല ഇംഗ്ലീഷ് വിഭാഗം പ്രൊഫസർ അറസ്റ്റില്‍.

പഴയങ്ങാടി മാടായി എരിപുരം അച്ചൂസ് ഹൗസില്‍ ബി.ഇഫ്തിക്കർ അഹമ്മദ് (51) ആണ് പിടിയിലായത്. തിങ്കളാഴ്ച വൈകീട്ട് മൂന്നോടെ പറശിനിക്കടവിലെ സ്വകാര്യ വാട്ടർതീം പാർക്കിലായിരുന്നു സംഭവം.

കാസർകോട്ടെ കേന്ദ്ര സർവകലാശാലയില്‍ അധ്യാപകനായ ഇഫ്തിക്കർ അഹമ്മദ് കുടുംബസമേതമാണ് പാർക്കില്‍ ഉല്ലാസത്തിനെത്തിയത്. പരാതിക്കാരിയും കുടുംബസമേതമാണ് വന്നത്. വേവ്പൂളില്‍വെച്ച്‌ ഇഫ്തിക്കർ അഹമ്മദ് യുവതിയെ കയറിപ്പിടിക്കുകയായിരുന്നു എന്നാണ് പരാതി. ഇവർ ബഹളംവെച്ചതോടെ പാർക്ക് അധികൃതർ പോലീസിനെ വിവരം അറിയിക്കുകയായിരുന്നു. സ്ത്രീകള്‍ക്കെതിരെയുള്ള അതിക്രമം തടയല്‍ നിയമപ്രകാരമാണ് തളിപ്പറമ്ബ് പോലീസ് കേസെടുത്തിരിക്കുന്നത്.