മുണ്ടുടുത്ത മോദി; മുഖ്യമന്ത്രിയെ വിമര്‍ശിച്ച്‌ മുസ്‌ലീം ലീഗ്

മുഖ്യമന്ത്രി പിണറായി വിജയനെ രൂക്ഷമായി വിമർശിച്ച്‌ മുസ്‌ലീം ലീഗ്. മുഖപത്രമായ ചന്ദ്രികയിലാണ് വിമർശനം. മോദിയുടെ തന്ത്രങ്ങളുടെ കോപ്പി പേസ്റ്റുമായാണ് മുണ്ടുടുത്ത മോദിയുടെ പടപ്പുറപ്പാടെന്നാണ് മുഖപത്രത്തിലെ കുറ്റപ്പെടുത്തല്‍.

പിണറായി വിജയനെ ലക്ഷ്യം വെച്ചാണ് സിപിഎം നേതൃയോഗങ്ങളില്‍ വിമർശനം ഉയർന്നതെന്നും സ്വന്തം മുഖം വികൃതമായത് മനസിലാകാതെ മറ്റു പാർട്ടികളുടെ മുഖം വികൃതമാണെന്ന് വിളിച്ചു പറയുകയാണ് മുഖ്യമന്ത്രിയെന്നും വിമര്‍ശിക്കുന്നു.

ഭരണപരമായ പോരായ്മയാണ് തെരഞ്ഞെടുപ്പ് തോല്‍വിക്ക് കാരണമെന്ന് മുഖ്യമന്ത്രിയും പി ആർ ടീമും മാത്രം തിരിച്ചറിഞ്ഞിട്ടില്ല. പ്രശ്നങ്ങള്‍ കാണിക്കുന്ന കണ്ണാടി കുത്തി പൊട്ടിക്കുന്നതാണ് ഹീറോയിസം എന്നാണ് ധാരണ. ഇതിലും വലിയ അടി കിട്ടുമെന്ന് കരുതിയാണ് ഇപ്പോള്‍ വാർഡുകള്‍ വെട്ടി കീറുന്നത്. വീണ്ടും തോറ്റാല്‍ സിപിഎമ്മിനെ കാണാൻ മ്യൂസിയത്തില്‍ തിരയേണ്ടി വരുമെന്ന് നേതാക്കള്‍ പോലും പറയുന്നു.

സിപിഎമ്മിലെ ഈഴവ വോട്ടുകള്‍ സംഘപരിവാരത്തിലേക്ക് ഹോള്‍സെയിലായി എത്തിക്കുന്ന പാലമാണ് വെള്ളാപ്പള്ളി. നവോഥാന മതില്‍ കെട്ടാൻ കരാർ നല്‍കിയ പിണറായിയും പാർട്ടിയും ഇപ്പോഴും ഇത് തിരിച്ചറിഞ്ഞിട്ടില്ല. ‌

മുഖ്യമന്ത്രിയിലേക്ക് വിമർശനം ഉയർന്നപ്പോള്‍ ന്യായീകരണം ചമയ്ക്കാൻ എം.വി. ഗോവിന്ദൻ പാടുപെടുകയാണെന്നും മുഖപ്രസംഗത്തില്‍ വിമർശിക്കുന്നു.