ഫണ്ടിന് പഞ്ഞമില്ലാത്തയാളാണ് ”ലൂസിഫറിലെ ബോബി” കോടികൾ കൊണ്ട് അമ്മാനമാടുന്ന വിവേക് ഒബ്‌റോയ്

ബോളിവുഡ് താരം വിവേക് ഒബ്രോയ് മലയാളികൾക്ക് സുപരിചിതനാണ്. ലൂസിഫർ എന്ന ചിത്രത്തിലെ പ്രധാന വില്ലൻ വേഷത്തിലൂടെ കയ്യടി വാങ്ങിയ ആളാണ് വിവേക് ഒബ്‌റോയ്. അടുത്തിടെ റോൾസ് റോയ്സ് സൂപ്പർ ലക്ഷ്വറി എസ്‌.യു.വി.യായ ‘റോള്‍സ് റോയ്‌സ് കള്ളിനന്‍’ സ്വന്തമാക്കിയതും വലിയ വാര്‍ത്താ ആയിരുന്നു. 12 കോടി രൂപ വിലയുള്ള അത്യാഡംബര കാറാണ് താരം സ്വന്തമാക്കിയത്.

ഇന്ത്യയില്‍ റോള്‍സ് റോയ്​സ് വാങ്ങുന്ന ആദ്യസിനിമ താരമല്ല വിവേക് ഒബ്‌റോയ്. എന്നാൽ നമ്മുടെ രാജ്യത്ത് റോള്‍സ് റോയ്​സ് വാങ്ങിയിട്ടുള്ളതെല്ലാം വമ്പന്‍ താരങ്ങളാണ്. ആ നിരയിലേക്ക് എത്താത്ത ആളാണ് വിവേക്.

എന്നാൽ പലപ്പോളും സിനിമയിൽ അടിപതറിയെങ്കിലും, മറ്റൊരു വശത്ത് തന്‍റേതായ ബിസിനസ് സാമ്രാജ്യം കെട്ടിപ്പടുക്കുകയായിരുന്നു വിവേക് ഒബ്രോയ് എന്ന ബിസിനസ്സുകാരൻ. ഇന്ന് 1200 കോടിയുടെ ആസ്ഥിയാണ് വിവേക് ഒബ്രോയ്​ക്ക് ഉള്ളതെന്നാണ് പുറത്തുവരുന്ന റിപ്പോര്‍ട്ടുകള്‍. കഴിഞ്ഞ രണ്ട് ദശാബ്​ദങ്ങള്‍ കൊണ്ട് വിവേക് നേടിയ വളര്‍ച്ച മറ്റ് ഇന്ത്യന്‍ സംരഭകരെ അസൂയപ്പെടുത്താന്‍ പോന്ന രീതിയിൽ ഉള്ളതാണ്.

കരിയറിന്‍റെ തുടക്കകാലത്ത് ചില ഹിറ്റ് സിനിമകൾ കൊണ്ട് പ്രേക്ഷകരെ അമ്പരിപ്പിച്ച വിവേക് ഇനി ബോളിവുഡ് അടക്കി ഭരിക്കും എന്ന തോന്നല്‍ പോലും സൃഷ്​ടിച്ചിരുന്നു. അതിന് പിന്നാലെ ഐശ്വര്യ റായിക്കൊപ്പമുള്ള പ്രണയവും, തുടര്‍ന്ന് സല്‍മാന്‍ ഖാനുമായി ഉണ്ടായ ചില്ലറ വഴക്കുകളും ഒക്കെ അദ്ദേഹത്തിന്റെ വളര്‍ച്ച മങ്ങുന്നതിനു കാരണമായി.

പിന്നീട് അഭിനയിച്ച ചിത്രങ്ങളൊക്കെ ബോക്​സ് ഓഫീസില്‍ പരാജയപ്പെടുന്നതും, പുതിയ ചിത്രങ്ങള്‍ ലഭിക്കാത്ത അവസ്ഥയും ഉണ്ടായിരുന്നു. വിവേക് ഒബ്രോയിക്ക് ബോളിവുഡില്‍ നിന്നും വിലക്ക് നേരിട്ടെന്ന തരത്തില്‍ വരെ സംസാരങ്ങള്‍ ഉണ്ടായി. ഇനി ഒരിക്കലും പഴയ പ്രതാപത്തിലേക്ക് വിവേകിന് തിരികെയെത്താനാവില്ല എന്ന് ഇതിനോടകം തന്നെ എല്ലാവരും തീർച്ചപ്പെടുത്തിയിരുന്നു.

എന്നാൽ തന്റെ സിനിമാ കരിയറില്‍ സഹതപിച്ചവരേയും സന്തോഷിച്ചവരേയും പരിഹസിച്ചവരേയും ഒരുപോലെ ഞെട്ടിച്ചുകൊണ്ടാണ് ബിസിനസില്‍ വിവേക് വളർന്നത്. രാജ്യത്തെ വലിയ സമ്പന്നന്‍മാരുടെ പട്ടികയിൽ അദ്ദേഹം ഇടം നേടിയിരിക്കുന്നു. സിനിമാ താരങ്ങളിലെ കോടീശ്വരന്മാരായ രണ്‍ബീര്‍ കപൂറും അല്ലു അര്‍ജുനും പ്രഭാസും രജിനികാന്തുമെല്ലാം ഇന്ന് ആസ്ഥിയുടെ കാര്യത്തില്‍ വിവേകിന് പിന്നിലാണ്.

റിയല്‍ എസ്​റ്റേറ്റ് കമ്പനിയായ കര്‍മ ഇന്‍ഫ്രാസ്​ട്രക്​ചര്‍, ഇവന്‍റ് മാനേജ്മെന്‍റ് കമ്പനിയായ മെഗാ എന്‍റര്‍ടെയിന്‍മെന്‍റ് എന്നിവയാണ് വിവേകിന്റെ വരുമാനത്തിന്റെ പ്രധാന ഉറവിടങ്ങൾ.

റാസൽഖൈമയിലെ അൽ മർജാൻ ദ്വീപിൽ 2,300 കോടി രൂപയുടെ പദ്ധതിയായ അക്വാ ആർക്കിന്‍റെ സ്ഥാപകനും സവർണിം സർവകലാശാലയുടെ സഹസ്ഥാപകനുമാണ് വിവേക്. കൂടാതെ നിരവധി സ്റ്റാർട്ടപ്പുകളിൽ നിക്ഷേപകൻ കൂടിയാണ്. ഇതിനൊപ്പമാണ് അഭിനയവും വിവേക് ഇപ്പോൾ ചെയ്യുന്നത്.