അക്ഷരമാലയിലെ പിഴവ്; നാല് വയസുകാരന് അധ്യാപകന്റെ ക്രൂരമര്‍ദനം

ഇംഗ്ലീഷ് അക്ഷരമാല പഠിക്കാത്തതിനെ തുടര്‍ന്ന് നാലു വയസുകാരനെ അധ്യാപകന്‍ മര്‍ദിച്ചു. പള്ളുരുത്തിയിലാണ് സംഭവം നടന്നത്. ട്യൂഷന്‍ അധ്യാപകനായ നിഖിലാണ് കുട്ടിയെ ക്രൂരമായി മര്‍ദിച്ചത്. കുട്ടിയുടെ മാതാപിതാക്കള്‍ പൊലീസില്‍ പരാതി നല്‍കിയതിനെ തുടര്‍ന്ന് ഇയാളെ റിമാന്‍ഡ് ചെയ്തു.

പിഎച്ച്ഡി ബിരുദധാരിയായ ഇയാള്‍ പള്ളുരുത്തിയില്‍ ട്യൂഷന്‍ സെന്റര്‍ നടത്തുകയാണ്. കുട്ടിക്ക് വിട്ടുമാറാത്ത പനി വന്നതിനെ തുടര്‍ന്ന് ഡോക്ടറെ കാണിച്ചപ്പോഴാണ് അധ്യാപകന്‍ മര്‍ദിച്ച കാര്യം മാതാപിതാക്കള്‍ അറിഞ്ഞത്. കഴിഞ്ഞ തിങ്കളാഴ്ച്ചയും ചൊവ്വാഴ്ച്ചയും അധ്യാപകന്‍ മര്‍ദിച്ചതായി കുട്ടി പറഞ്ഞു. എ ബി സി ഡി പഠിക്കാത്തതിനാണ് അടികിട്ടിയതെന്നും കുട്ടി പറഞ്ഞു.

കുട്ടിയെ മര്‍ദിച്ചത് അറിഞ്ഞ ഉടനെ തന്നെ മാതാപിതാക്കള്‍ പൊലീസിലും ചൈല്‍ഡ് ലൈനിനും പരാതി നല്‍കി. തുടര്‍ന്ന് പൊലീസ് അറസ്റ്റ് ചെയ്ത നിഖിലിനെ റിമാന്‍ഡ് ചെയ്തു. കുട്ടിയെ മര്‍ദിക്കാനുണ്ടായ കാരണത്തെപറ്റി പ്രതി ഒന്നും പറയാന്‍ തയാറായിട്ടില്ലെന്നാണ് പൊലീസ് പറയുന്നത്.

Content Highlights – four year old boy was beaten by a teacher, Accused Remanded