സൗദിയും , ഇസ്രയേലും കൈകോർക്കുന്നു ..
പക്ഷെ ചില നിബന്ധനകൾ ഉണ്ട് ..
National Desk
Posted On May 2, 2024
സൗദി അറേബ്യയും ഇസ്രയേലും തമ്മിലുള്ള ബന്ധം സാധാരണ നിലയിലാക്കാനുള്ള ചര്‍ച്ചകള്‍ വീണ്ടും സജീവം. ഇതുമായി ബന്ധപ്പെട്ട് അമേരിക്കയുടെ മധ്യസ്ഥതയില്‍ ഇരുവിഭാഗവും ഏകദേശ ധാരണയില്‍ എത്തിയതായാണ് റിപ്പോര്‍ട്ട്. ഇസ്രായേലുമായുള്ള ചങ്ങാത്തത്തിന് പകരമായി സൗദി അറേബ്യയ്ക്ക് നിര്‍ണായക വാഗ്ദാനമാണ് അമേരിക്ക മുന്നോട്ടുവച്ചിരിക്കുന്നത്.ഇസ്രായേലുമായുള്ള ബന്ധം സാധാരണ നിലയിലാക്കുന്നതിന് പകരമായി സൗദി അറേബ്യയ്ക്ക് ഒരു സുരക്ഷാ പാക്കേജ് എന്ന വ്യവസ്ഥ ഏറെക്കുറെ അംഗീകരിക്കപ്പെട്ടതാണെന്നാണ് അമേരിക്കയുടെ സ്റ്റേറ്റ് സെക്രട്ടറി ആന്റണി ബ്ലിങ്കൻ പറഞ്ഞത്. സൗദി തലസ്ഥാനമായ റിയാദില്‍ നടന്ന ലോക സാമ്പത്തിക ഫോറത്തിന്റെ യോഗത്തില്‍ സംസാരിക്കുകയായിരുന്നു അദ്ദേഹം. സൗദി അറേബ്യയും ഇസ്രായേലും തമ്മിലുള്ള കരാറുകളുമായി ബന്ധപ്പെട്ട ചര്‍ച്ചകള്‍ അന്തിമഘട്ടത്തിലാണെന്നും അദ്ദേഹം പറഞ്ഞു. ഇസ്രായേല്‍- സൗദി സൗഹൃദ കരാറിനെ കുറിച്ച് ഈ രീതിയില്‍ അമേരിക്കയുടെ ഭാഗത്തു നിന്ന് വ്യക്തമായ ഒരു പ്രഖ്യാപനം ഉണ്ടാവുന്നത് ഇതാദ്യമായാണ്.
ഒക്ടോബറില്‍ ഇസ്രായേല്‍- ഗാസ യുദ്ധം ആരംഭിച്ചതിനു ശേഷം ഏഴാമത്തെ തവണയാണ് ബ്ലിങ്കണ്‍ സൗദിയിലെത്തുന്നത്. ഇതുമായി ബന്ധപ്പെട്ട് സൗദി കിരീടാവകാശി മുഹമ്മദ് ബിന്‍ സല്‍മാന്‍രാജകുമാരനുമായി ബ്ലിങ്കെന്‍ ഇന്നലെ കൂടിക്കാഴ്ച നടത്തിയിരുന്നു.
അതേസമയം, ഇരു രാജ്യങ്ങളും തമ്മില്‍ ബന്ധം സാധാരണ നിലയിലാകണമെങ്കില്‍ ഗസയില്‍ സമാധാനം കൈവരികയും സ്വതന്ത്ര പലസ്തീന്‍ രാഷ്ട്രം നിലവില്‍ വരികയും ചെയ്യണമെന്ന നിബന്ധനയാണ് സൗദി അറേബ്യ മുന്നോട്ടുവയ്ക്കുന്നത്. ഇത്തരമൊരു കരാര്‍ നടപ്പിലാവണമെങ്കില്‍ ഇസ്രായേലിന്റെ നിലവിലെ നിലപാടില്‍ അയവു വേണമെന്നാണ് അമേരിക്കന്‍ പ്രസിഡന്റ് ജോ ബെയ്ഡന്റെ പക്ഷം. അതിനായി ഇസ്രായേലിനു മേല്‍ അമേരിക്ക സമ്മര്‍ദ്ദം ചെലുത്തിവരികയാണ്. അതേസമയം, സ്വതന്ത്ര പലസ്തീന്‍ രാഷ്ട്രത്തിന് അംഗീകാരം നല്‍കുന്ന പക്ഷം ഇസ്രായേലിനും കൂടുതല്‍ ഇളവുകള്‍ പ്രഖ്യാപിക്കാന്‍ അമേരിക്ക ഒരുക്കമാണെന്നാണ് റിപ്പോര്‍ട്ട്.
നിലവില്‍ യുഎഇ, ബഹ്റൈന്‍, മൊറോക്കോ എന്നീ മൂന്ന് അറബ് രാജ്യങ്ങള്‍ ഇസ്രായേലുമായുള്ള ബന്ധം സാധധാരണ നിലയിലാക്കിയിട്ടുണ്ട്. 2020ല്‍ ഡൊണാള്‍ഡ് ട്രംപ് പ്രസിഡന്റായിരിക്കെ അമേരിക്കയുടെ നേതൃത്വത്തിലുണ്ടാക്കിയ അബ്രഹാം ഉടമ്പടി പ്രകാരമായിരുന്നു ഇത് സാധ്യമായത്. എന്നാല്‍ ഇവയില്‍ നിന്ന് വ്യത്യസ്തമായി സൗദി അറേബ്യയും ഇസ്രായേലും തമ്മിലുള്ള ബന്ധം സാധാരണ നിലയിലാക്കുന്നതിന് വലിയ പ്രാധാന്യമാണ് ഇസ്രായേലും അമേരിക്കയും നല്‍കുന്നത്. മക്ക, മദീന എന്നീ ലോക മുസ്ലിംകളുടെ രണ്ട് പ്രധാന തീര്‍ഥാടനകേന്ദ്രങ്ങള്‍ സൗദിയിലാണെന്നതാണ് ഇതിന്റെ പ്രധാന കാരണം. അതുകൊണ്ടുതന്നെ മുസ്ലിം ലോകത്ത് സൗദിക്ക് വലിയ പ്രാധാന്യമുണ്ട്. സൗദി അറേബ്യയുമായുള്ള സമാധാന കരാര്‍ മുസ്ലിം ലോകത്തിന്റെ അംഗീകാരമായാണ് ഇസ്രായേലും യുഎസ്സും കരുതുന്നത്.
ഇസ്രായേലുമായുള്ള സൗഹൃദത്തിന് പകരം അമേരിക്കയില്‍ നിന്ന് ലഭിക്കാനിടയുള്ള സുരക്ഷാ പാക്കേജുമായി ബന്ധപ്പെട്ട ചര്‍ച്ചകള്‍ അന്തിമ ഘട്ടത്തിലാണെന്ന് സൗദി വിദേശകാര്യ മന്ത്രി ഫൈസല്‍ ബിന്‍ ഫര്‍ഹാന്‍ രാജകുമാരനും സമ്മതിച്ചു. റിയാദില്‍ ബ്ലിങ്കനുമായി കൂടിക്കാഴ്ച നടത്തിയ ശേഷമാണ് അദ്ദേഹം ഇകക്കാര്യം വ്യക്തമാകക്കിയത്. യുഎസ്-സൗദി കരാറുകള്‍ വളരെ അടുത്തു തന്നെ യാഥാര്‍ഥ്യമാവുമെന്നും ഇതുമായി ബന്ധപ്പെട്ട ഭൂരിഭാഗം ജോലികളും ഇതിനകം പൂര്‍ത്തിയായിട്ടുണ്ടെന്നും അദ്ദേഹം പറഞ്ഞു. അതേസമയം, സ്വതന്ത്ര പലസ്തീന്‍ യാഥാര്‍ഥ്യമായാല്‍ മാത്രമേ ഇത് പ്രവര്‍ത്തന രംഗത്തേക്ക് കൊണ്ടുവരാനാവൂ എന്നും അദ്ദേഹം കൂട്ടിച്ചേര്‍ത്തു. അതേസമയം, സ്വതന്ത്ര ഫലസ്തീന്‍ എന്ന ആശയത്തിന്റെ ശക്തനായ എതിരാളിയായ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ കൊണ്ട് ഇക്കാര്യം സമ്മതിപ്പിക്കാനുള്ള ശ്രമത്തിലാണ് ബെയ്ഡന്‍ ഭരണകൂടം. നിലവില്‍ ഫലസ്തീന്‍ പ്രശ്‌ന പരിഹാരത്തിനുള്ള ഏക വഴി സ്വതന്ത്ര ഫലസ്തീന്‍ രാഷ്ട്രമാണെന്ന നിഗമനത്തിലാണ് യുഎസ്.
അതേസമയം, ബെയ്ഡന്‍ ഭരണകൂടം സൗദി അറേബ്യയുമായി ഒരു കരാറില്‍ എത്തിയാലും, അത് നടപ്പില്‍ വരണമെങ്കില്‍ യുഎസ് കോണ്‍ഗ്രസ് അംഗീകരിക്കേണ്ടതുണ്ട്. എന്നാല്‍ ബെയ്ഡന്റെ ഡെമോക്രാറ്റിക് പാര്‍ട്ടിയില്‍ നിന്നുള്ളവര്‍ അടക്കമുള്ള യുഎസ് കോണ്‍ഗ്രസിലെ ഒരു വിഭാഗം അംഗങ്ങള്‍ സൗദിയുമായുള്ള സൗഹൃദത്തിന്റെ വിമര്‍ശകരാണ്. പ്രത്യേകിച്ചും മനുഷ്യാവകാശ ലംഘനവുമായി ബന്ധപ്പെട്ട വിഷയങ്ങളില്‍ സൗദിയുടെ ശക്തരായ വിമര്‍ശകരാണിവര്‍. എന്നാല്‍, മേഖലയിലെ രാജ്യങ്ങള്‍ തമ്മിലുള്ള സഹകരണവും യുഎസും സൗദി അറേബ്യയും തമ്മിലുള്ള സഹകരണവും ശക്തിപ്പെടുുത്തുന്നതിലൂടെ മേഖലയില്‍ ശാശ്വത സമാധാനവും സുരക്ഷയും കൈവരിക്കാനാകുമെന്നാണ് അമേരിക്കന്‍ അധികൃതരുടെ വാദം.
Trending Now
