“ഞങ്ങൾക്ക് അറിയാം,ഹമാസിനെ കൈകാര്യം ചെയ്യാൻ”
അമേരിക്കയ്ക്ക് നെതന്യാഹുവിന്റെ പരോക്ഷ മുന്നറിയിപ്പ്

മധ്യസ്ഥ ചർച്ചകൾ വീണ്ടും പരാജയപ്പെട്ടതോടെ ഹമാസ്,ഇസ്രായേൽ സംഘങ്ങൾ കെയ്‌റോവിട്ടു. റഫ ആക്രമണ പദ്ധതിയിൽ നിന്ന്​ പി​റകോട്ടില്ലെന്ന ഇസ്രായേൽ നിലപാടാണ്​ ചർച്ചക്ക്​ തിരിച്ചടിയായത്​. ഹമാസ്​, ഇസ്രായേൽ സംഘങ്ങൾ കെയ്‌റോയിൽ നിന്ന്​ മടങ്ങി.
റഫ ആക്രമണമാണ് ചർച്ച പരാജയപ്പെടാൻ കാരണമായതെന്നും കരാർ നിർദേശങ്ങളിൽ തങ്ങളുടെ നിലപാടിൽ മാറ്റമില്ലെന്നും ഹമാസ് നേതാവ് ഇസ്സത്ത് അൽ റഷീഖ് അറിയിച്ചു. റഫയിൽ ആക്രമണം തുടരാൻ ഇസ്രായേൽ യുദ്ധക്കാബിനറ്റ്​ തീരുമാനിച്ചതും കൈറോ ചർച്ചക്ക് തിരിച്ചടിയായി.
റഫ ആക്രമണത്തിന് ആയുധങ്ങൾ കൈമാറില്ലെന്ന യുഎസ് പ്രസിഡന്റ് ജോ ബൈഡ​െൻറ പ്രതികരണത്തിൽ ശക്​തമായ എതിർപ്പുമായി നെതന്യാഹു ഉൾപ്പെടെ ഇസ്രായേൽ നേതാക്കൾ. ഇന്ന്​ ചേരുന്ന യുദ്ധകാര്യ മന്ത്രിസഭാ യോഗം വിഷയം ചർച്ച ചെയ്യും. സ്വന്തം നിലക്കു തന്നെ ഹമാസിനെ അമർച്ച ചെയ്യാൻ ഇസ്രാ​യേലിനാകുമെന്ന്​ അമേരിക്കക്കുള്ള പരോക്ഷ മുന്നറിയി​പ്പെന്നോണം നെതന്യാഹു പറഞു. ഹമാസിനെ പിന്തുണക്കുന്ന നിലപാടാണ്​ ബൈഡൻ സ്വീകരിക്കുന്നതെന്ന്​ മന്ത്രി ബെൻ ഗവിർ കുറ്റപ്പെടുത്തി.
എന്നാൽ വടക്കൻ അതിർത്തിയിൽ ഹിസ്​ബുല്ലയെ നേരിടാൻ യു.എസ്​ പിന്തുണ അനിവാര്യമാണെന്ന നിലപാടിലാണ്​ ഗാൻറ്​സ്​ ഉൾപ്പെടെ ചില മന്ത്രിമാരും സൈനിക നേതൃത്വവും. ഇസ്രായേലിനുള്ള ആയുധ കൈമാറ്റത്തിൽ അന്തിമ തീരുമാനമായില്ലെന്ന്​ ​​ പെൻറഗൺ. വ്യാപക ആക്രമണം ഇല്ലാതെ ഹമാസിനെ അമർച്ച ചെയ്യാനുളള ചില നിർദേശങ്ങൾ ഇസ്രായേലിന്​ നേരത്തെ കൈമാറിയതായും പെൻറഗൺ നേതൃത്വം.
ഗസ്സ തീരത്ത്​ അമേരിക്ക മുൻകൈയെടുത്ത്​ നിർമിച്ച താൽക്കാലിക തുറമുഖം ലക്ഷ്യമിട്ടുള്ള ആദ്യ കപ്പൽ സെപ്രസിൽ നിന്ന്​ പുറപ്പെട്ടു. തുറമുഖം മുഖേനയുള്ള സഹായവിതരണം ഹമാസ്​ തടയില്ലെന്നാണ്​ പ്രതീക്ഷയെന്ന്​ അമേരിക്ക പ്രതികരിച്ചു.
അതേ സമയം മൂന്ന്​ സൈനികർക്ക്​ പരിക്കേറ്റതായി ഇസ്രായേൽ വ്യക്താക്കി. 50 സ്​പാനിഷ്​ സർവകലാശാലകൾ ഇസ്രായേൽ യൂനിവേഴ്​സിറ്റികളുമായുള്ള ബന്​ധം വിഛേദിച്ചു. വെടിനിർത്തൽ കരാർ ആവശ്യപ്പെട്ട്​ തെൽ അവീവിൽ ബന്ദികളുടെ ബന്​ധുക്കളുടെ പ്രതിഷേധം ഇന്നലെയും തുടർന്നു. വിവിധ രാജ്യങ്ങളിലുള്ള സർവകലാശാലയിൽ ഫലസ്തീൻ അനുകൂല പ്രതിഷേധവും തുടരുകയാണ് .

അതെ സമയം ഇറാൻ പിടിച്ചെടുത്ത ഇസ്രായേലി ബന്ധമുള്ള കപ്പലിലെ അഞ്ച് ഇന്ത്യൻ നാവികരെ വ്യാഴാഴ്ച വിട്ടയച്ചതായി ഇറാനിലെ ഇന്ത്യൻ എംബസി സ്ഥിരീകരിച്ചു. വൈകുന്നേരത്തോടെ നാവികർ രാജ്യം വിട്ടതായും റിപ്പോർട്ടിൽ പറയുന്നു.
മോചനത്തിൻ്റെ വിശദാംശങ്ങൾ പങ്കുവെച്ചുകൊണ്ട് ഇന്ത്യൻ എംബസി, ബന്ദർ അബ്ബാസിലെ എംബസിയുമായും ഇന്ത്യൻ കോൺസുലേറ്റുമായും ഇറാൻ അധികൃതരുടെ ഏകോപനത്തിന് നന്ദി അറിയിച്ചു.
“എംഎസ്‌സി ഏരീസിലെ 5 ഇന്ത്യൻ നാവികരെ മോചിപ്പിച്ച് ഇന്ന് വൈകുന്നേരം ഇറാനിൽ നിന്ന് പുറപ്പെട്ടു. ബന്ദർ അബ്ബാസിലെ എംബസിയുമായും ഇന്ത്യൻ കോൺസുലേറ്റുമായും അടുത്ത ഏകോപനത്തിന് ഇറാനിയൻ അധികാരികളെ ഞങ്ങൾ അഭിനന്ദിക്കുന്നു.” ഇറാനിലെ ഇന്ത്യൻ എംബസി എക്‌സ് പോസ്റ്റിൽ കുറിച്ചു.
ഏപ്രിൽ 13 നാണ് 17 ഇന്ത്യക്കാരടങ്ങുന്ന ഇസ്രയേലുമായി ബന്ധമുള്ള ചരക്ക് കപ്പൽ ഇറാൻ പിടിച്ചെടുത്തത്. ഇതിൽ ഒരു വനിതയുൾപ്പെടെ 4 പേർ മലയാളികളാണ്. തൃശൂർ സ്വദേശിനിയായ ആൻ ടെസ ജോസഫിനെ ഏപ്രിൽ 18ന് മോചിപ്പിച്ച് നാട്ടിലേക്കയച്ചിരുന്നു. ഇറാനിൽ നിന്ന് കൊച്ചി രാജ്യാന്തര വിമാനത്താവളത്തിൽ എത്തിയ ആൻ ടെസയെ സർക്കാർ ഉദ്യോഗസ്ഥർ സ്വീകരിക്കുകയും ചെയ്തിരുന്നു.
ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സ് നേവി ഹോർമുസ് കടലിടുക്കിന് സമീപമാണ് കണ്ടെയ്‌നർ കപ്പൽ പിടിച്ചെടുത്തത്. എംഎസ്‌സി ഏരീസ് അവസാനമായി ഏപ്രിൽ 12 ന് ദുബായ് തീരത്ത് ഹോർമുസ് കടലിടുക്കിലേക്കാണ് യാത്ര ചെയ്തിരുന്നത്.