യുവനടിയെ ബലാത്സംഗം ചെയ്ത കേസ്; വിജയ് ബാബുവിനെ ഇന്ന് മുതല്‍ ചോദ്യം ചെയ്യും

യുവനടിയെ പീഡിപ്പിച്ച കേസില്‍ നിര്‍മാതാവും നടനുമായ വിജയ് ബാബുവിനെ അന്വേഷണ സംഘം ഇന്ന് ചോദ്യം ചെയ്യും. ഇന്ന് മുതല്‍ ജൂലൈ മൂന്ന് വരെ രാവിലെ 9 മുതല്‍ വൈകീട്ട് 6 മണി വരെ ചോദ്യം ചെയ്യാനാണ് ഹൈക്കോടതി അനുമതി നല്‍കിയത്. ചോദ്യം ചെയ്യലിനൊപ്പം കേസുമായി ബന്ധപ്പെട്ട തെളിവെടുപ്പും ഈ ദിവസങ്ങളില്‍ ഉണ്ടാകും.

കേസുമായി ബന്ധപ്പെട്ട് അന്വേഷണ സംഘത്തിന് അറസ്റ്റ് രേഖപ്പെടുത്താമെന്ന് കോടതിയുടെ ഉത്തരവിലുണ്ട്. അറസ്റ്റ് ചെയ്യുകയാണെങ്കില്‍ സേറ്റേഷന്‍ ജാമ്യം നല്‍കണം എന്നാണ് കോടതി നല്‍കിയ നിര്‍ദേശം.

ജൂണ്‍ 22-ാം തീയതിയാണ് ജസ്റ്റിസ് ബെച്ചു കുര്യന്‍ തോമസിന്റെ ബെഞ്ച് വിജയ് ബാബുവിന് ജാമ്യം അനുവദിച്ചത്. അഞ്ച് ലക്ഷം രൂപയുടെ ബോണ്ടിലും കര്‍ശന ഉപാധികളോടും കൂടിയാണ് കോടതി ജാമ്യം നല്‍കിയത്.

ഏപ്രില്‍ 22നാണ് യുവനടി വിജയ് ബാബുവിനെതിരെ പീഡന പരാതി നല്‍കിയത്. കേസ് രജിസ്റ്റര്‍ ചെയ്തതിന് പിന്നാലെ പരാതിക്കാരുടെ പേര് വെളിപ്പെടുത്തി വിജയ് ബാബു രംഗത്തെത്തി. ഇതിൽ മറ്റൊരു കേസ് കൂടി വിജയ് ബാബുവിനെതിരെയുണ്ട്.

Content Highlights – Vijay Babu, Case of assault On Young Actress