എല്‍എല്‍ബി പരീക്ഷയ്ക്ക് കോപ്പിയടിച്ചു; തിരുവനന്തപുരത്ത് സിഐക്ക് സസ്‌പെന്‍ഷന്‍

എല്‍എല്‍ബി പരീക്ഷയ്ക്ക് കോപ്പിയടിച്ച എസ്‌ഐക്ക് സസ്‌പെന്‍ഷന്‍. തിരുവനന്തപുരം പോലീസ് ട്രെയിനിംഗ് കോളേജിലെ ഇന്‍സ്‌പെക്ടറായ ആദര്‍ശിനെയാണ് സസ്‌പെന്‍ഡ് ചെയ്തത്. ഇയാള്‍ കോപ്പിയടിച്ചതായി സര്‍വകലാശാല പരീക്ഷാ സ്‌ക്വാഡ് സ്ഥിരീകരിച്ചിരുന്നു. ഇതു സംബന്ധിച്ച് ഡിജിപിക്ക് റിപ്പോര്‍ട്ട് നല്‍കിയതിന്റെ അടിസ്ഥാനത്തിലാണ് നടപടി.

പോലീസ് ട്രെയിനിംഗ് കോളേജിലെ സീനിയര്‍ ഇന്‍സ്‌പെക്ടറായിരുന്ന ആദര്‍ശിനെ കോളേജിലെ ചുമതകളില്‍ നിന്ന് നീക്കാനും ഡിജിപി നിര്‍ദേശിച്ചു. ആദര്‍ശിന്റെ നടപടി ട്രെയിനിംഗ് കോളേജിന്റെ സല്‍പ്പേരിന് കളങ്കമായെന്ന് ഡിജിപിയുടെ ഉത്തരവില്‍ പറയുന്നു. തിരുവനന്തപുരം ലോ അക്കാഡമിയിലെ ഈവനിംഗ് ബാച്ച് വിദ്യാര്‍ത്ഥിയായിരുന്നു ഇയാള്‍.

ഇയാള്‍ ഉള്‍പ്പെടെ നാലുപേരെയാണ് കോപ്പിയടിച്ചതിന് സര്‍വകലാശാല പരീക്ഷാ സ്‌ക്വാഡ് പിടികൂടിയത്. മറ്റുള്ളവരെക്കുറിച്ചുള്ള വിവരങ്ങള്‍ പുറത്തുവിട്ടിട്ടില്ല. സംംഭവത്തില്‍ റിപ്പോര്‍ട്ട് നല്‍കാന്‍ ഡിജിപി പോലീസ് ട്രെയിനിംഗ് കോളേജ് പ്രിന്‍സിപ്പലിനോട് ആവശ്യപ്പെട്ടിരുന്നു.