ആലുവ മാർക്കറ്റിന് സമീപം അതിഥി തൊഴിലാളിയെ ആക്രമിച്ച സംഭവം: ഒരാൾ കൂടി അറസ്റ്റിൽ

ആലുവ മാർക്കറ്റിന് സമീപം അതിഥി തൊഴിലാളിയെ ആക്രമിച്ച കേസിൽ ഒരാൾ കൂടി അറസ്റ്റിൽ. ചിറ്റാട്ടുകര കമ്പിവേലിക്കകത്ത് സംഗീത് (33) നെയാണ് ആലുവ പോലീസ് അറസ്റ്റ് ചെയ്തത്.

മാർച്ച് 12 ന് രാത്രിയാണ് കേസിനാസ്പദമായ സംഭവം നടന്നത്. പച്ചക്കറി മാർക്കറ്റ് വഴി നടന്നുവരികയായിരുന്ന അതിഥി തൊഴിലാളിയായ സുരേഷിനെ സംഗീതും സംഘവും തടഞ്ഞു നിർത്തി ആക്രമിക്കുകയായിരുന്നു. ഈ വഴിക്ക് വന്നതെന്തിനാണെന്ന് ചോദിച്ചായിരുന്നു ആക്രമണം.

സംഭവവുമായി ബന്ധപ്പെട്ട് രണ്ടുപേരെ പൊലീസ് നേരത്തെ അറസ്റ്റ് ചെയ്തിരുന്നു. പറവൂർ, മുനമ്പം, ആലുവ സ്റ്റേഷനുകളിലായി സംഗീതിന്‍റെ പേരിൽ 20 കേസുകളുണ്ട്. ഇൻസ്പെക്ടർ എൽ. അനിൽകുമാർ,  എസ്.ഐ ടി.വി.ഷാജു,  സി.പി.ഒ മാരായ മാഹിൻ ഷാ അബൂബക്കർ, എൻ.എ.മുഹമ്മദ് അമീർ, കെ.എം.മനോജ്, എച്ച്. ഹാരിസ് തുടങ്ങിയവർ ചേർന്നാണ് പ്രതികളെ പിടികൂടിയത്.