സൗദിയില്‍ നിന്ന് നെടുമ്പാശേരിയില്‍ എത്തിയതിന് ശേഷം കാണാതായ പ്രവാസി വെട്ടേറ്റ് മരിച്ചു

സൗദിയില്‍ നിന്ന് നെടുമ്പാശേരിയില്‍ വിമാനമിറങ്ങിയ ശേഷം കാണാതായ പ്രവാസി വെട്ടേറ്റ് മരിച്ചു. അഗളി വാക്യത്തൊടി അബ്ദുള്‍ ജലീല്‍ (42) ആണ് മരിച്ചത്. നെടുമ്പാശേരിയില്‍ എത്തി നാലാം ദിവസം വെട്ടേറ്റ പരിക്കുകളോടെ അബ്ദുള്‍ ജലീലിനെ മലപ്പുറം ആക്കപ്പറമ്പില്‍ കണ്ടെത്തുകയായിരുന്നു. പെരിന്തല്‍മണ്ണയിലെ ആശുപത്രിയില്‍ വെന്റിലേറ്ററിലായിരുന്ന അബ്ദുള്‍ ജലീല്‍ രാത്രി 12-15ഓടെ മരിച്ചു.

മെയ് 15ന് രാവിലെയാണ് ജലീല്‍ സൗദിയില്‍ നിന്ന് എത്തിയത്. താന്‍ സുഹൃത്തിനൊപ്പം പെരിന്തല്‍മണ്ണയിലേക്ക് എത്താമെന്നും വാഹനവുമായി അവിടെയെത്തിയാല്‍ മതിയെന്നായിരുന്നു ഭാര്യയെ അറിയിച്ചത്. കുടുംബാംഗങ്ങള്‍ വാഹനവുമായി പെരിന്തല്‍മണ്ണയില്‍ കാത്തുനിന്നെങ്കിലും താന്‍ വൈകുമെന്ന് ജലീല്‍ പിന്നീട് ഫോണില്‍ അറിയിച്ചു. മടങ്ങിപ്പോകാനാണ് ജലീല്‍ നിര്‍ദേശിച്ചത്.

അടുത്ത ദിവസവും ജലീല്‍ എത്താതിരുന്നതിനെ തുടര്‍ന്ന് കുടുംബം അഗളി പോലീസ് സ്‌റ്റേഷനില്‍ വിവരം അറിയിച്ചു. ജലീല്‍ ഭാര്യയെ ഫോണില്‍ വിളിച്ചിരുന്നു. കേസ് പിന്‍വലിക്കണമെന്നായിരുന്നു 16-ാം തിയതി രാത്രി ഇയാള്‍ ഭാര്യയോട് ആവശ്യപ്പെട്ടത്. ഇതിന് ശേഷം ജലീലിനെക്കുറിച്ച് വിവരമൊന്നും ഇല്ലായിരുന്നു.

വ്യാഴാഴ്ച ഭാര്യക്ക് ലഭിച്ച ഇന്റര്‍നെറ്റ് കോളിലൂടെയാണ് ജലീല്‍ ആശുപത്രിയിലാണെന്ന വിവരം കുടുംബത്തിന് ലഭിച്ചത്. ശരീരത്തില്‍ മര്‍ദ്ദനമേറ്റതിന്റെ പാടുകളും ഉണ്ടായിരുന്നു.