മഴക്കെടുതി; മലപ്പുറം വഴിക്കടവ് മേഖലയിലും വന്‍ നാശം

തുലാവര്‍ഷം കനത്തതോടെ വടക്കന്‍ ജില്ലകളിലും കനത്ത നാശം. മലപ്പുറം ജില്ലയുടെ മലയോര മേഖലയായ വഴിക്കടവ് ഉള്‍പ്പെടെയുള്ള പ്രദേശങ്ങളില്‍ വീടുകളിലും കൃഷിയിടങ്ങളിലും വെള്ളം കയറി. അന്തര്‍ സംസ്ഥാന പാതയായ കെഎന്‍ജി റോഡില്‍ ഒരു മണിക്കൂറോളം ഗതാഗതം തടസ്സപ്പെട്ടു. മണിമൂളി മേഖലയില്‍ റോഡില്‍ വെള്ളക്കെട്ട് രൂപം കൊണ്ടതാണ് ഗതാഗതത്തെ ബാധിച്ചത്.

പ്രദേശത്തെ കാരക്കോടന്‍പുഴ, കലക്കന്‍പുഴ, അത്തിത്തോട് എന്നിവ കരകവിഞ്ഞൊഴുകിയതാണ് ദുരിതത്തിന് ഇടയാക്കിയത്. അത്തിത്തോടിനു ചേര്‍ന്നുള്ള അന്‍പതോളം വീടുകളില്‍ വെള്ളംകയറി. ഏക്കര്‍കണക്കിനു കൃഷിയിടങ്ങള്‍ വെള്ളത്തിനടിയിലായി.

ഇന്നലെ വൈകീട്ടോടെയായിരുന്നു മേഖലയില്‍ കനത്ത മഴ പെയ്തിറങ്ങിയത്. വൈകിട്ട് മൂന്നരയോടെ ആരംഭിച്ച മഴ മണിക്കൂറുകള്‍ തുടര്‍ന്നു. മരങ്ങള്‍ വീണും വീടുകള്‍ക്ക് നാശം സംഭവിച്ചു. പൂവത്തിപ്പൊയില്‍ ഡീസന്റ് കുന്ന് നഗറിലെ 20ഓളം വീടുകളില്‍ വെള്ളം കെട്ട് തുടരുകയാണ്.