പാലക്കാട് ടൂറിസ്റ്റ് ബസും വാനും കൂട്ടിയിടിച്ച് 2 പേര്‍ക്ക് ദാരുണാന്ത്യം; അഞ്ചു പേരുടെ നില ഗുരുതരം

പാലക്കാട് ടൂറിസ്റ്റ് ബസും വാനും കൂട്ടിയിടിച്ച് രണ്ടുപേർ മരിച്ചു. ട്രാവലറില്‍ യാത്ര ചെയ്ത ആലപ്പുഴ സ്വദേശികളാണ് മരിച്ചത്. മുപ്പതോളം പേര്‍ക്ക് പരിക്കേറ്റു. പരിക്കേറ്റവരിൽ അഞ്ചുപേരുടെ നില ഗുരുതരമാണ്. മംഗലം- ഗോവിന്ദപുരം സംസ്ഥാനപാതയിലാണ് അപകടം ഉണ്ടായത്. തിരുവല്ലയില്‍ നിന്നും പഴനിയിലേക്ക് പോകുകയായിരുന്ന ടൂറിസ്റ്റ് ബസും ആലപ്പുഴയിലേക്ക് പോകുന്ന ട്രാവലറും കൂട്ടിയിടിച്ചാണ് അപകടം നടന്നത്.

ശക്തമായ മഴ പെയ്യുന്നുണ്ടായിരുന്നെന്നും മഴയില്‍ ബസ് തെന്നിനീങ്ങി ട്രാവലറില്‍ ഇടിക്കുകയായിരുന്നെന്ന് നാട്ടുകാര്‍ പറഞ്ഞു. അപകടം നടന്ന ഉടന്‍ തന്നെ ഫയര്‍ഫോഴ്‌സും, പൊലീസും നാട്ടുകാരും ചേര്‍ന്ന് രക്ഷാപ്രവര്‍ത്തനം നടത്തി. പരിക്കേറ്റവരെ ഉടന്‍ തന്നെ നെന്മാറ, വടക്കഞ്ചേരി ആശുപത്രികളില്‍ പ്രവേശിപ്പിച്ചിരുന്നു.

Content Highlight – Tourist Bus and Van Collides Tragic end for 2, Five people are in critical condition