വിജയ് ബാബു ബുധനാഴ്ച കേരളത്തിലെത്തുമെന്ന് സൂചന; ദുബായ്-കൊച്ചി വിമാനത്തില്‍ ടിക്കറ്റെടുത്തു

പുതുമുഖ നടിയെ പീഡിപ്പിച്ച കേസില്‍ പ്രതിയായ വിജയ് ബാബു ബുധനാഴ്ച കേരളത്തിലെത്തുമെന്ന് സൂചന. ബുധനാഴ്ചയിലെ ദുബായ്-കൊച്ചി വിമാനത്തില്‍ വിജയ് ബാബു ടിക്കറ്റെടുത്തതായി അഭിഭാഷകന്‍ കോടതിയെ അറിയിച്ചു. തിങ്കളാഴ്ച ഹാജരാകുമെന്നായിരുന്നു ഹൈക്കോടതിയില്‍ നേരത്തേ വിജയ് ബാബുവിന്റെ അഭിഭാഷകന്‍ അറിയിച്ചിരുന്നത്. വിമാന ടിക്കറ്റിന്റെ പകര്‍പ്പും ഹാജരാക്കിയിരുന്നു. എന്നാല്‍ ഇന്ന് രാവിലെ ദുബായ്-കൊച്ചി എമിറേറ്റ്‌സ് വിമാനത്തിലെ ടിക്കറ്റ് റദ്ദാക്കുകയായിരുന്നു.

ജാമ്യഹര്‍ജി ചൊവ്വാഴ്ച കോടതി പരിഗണിക്കും. കോടതി അറസ്റ്റ് തടഞ്ഞിട്ടില്ലാത്തതിനാല്‍ വിമാനത്താവളത്തില്‍ വെച്ചു തന്നെ അറസ്റ്റ് ചെയ്യാനുള്ള ക്രമീകരണങ്ങള്‍ പോലീസ് നടത്തിയിരുന്നു. അറസ്റ്റ് ഒഴിവാക്കാനാണ് വിജയ് ബാബു തിങ്കളാഴ്ചത്തെ യാത്ര റദ്ദാക്കിയത്. കേസില്‍ വിജയ് ബാബു നാട്ടിലെത്തിയതിന് ശേഷം തുടര്‍നടപടികള്‍ സ്വീകരിച്ചാല്‍ പോരേയെന്നായിരുന്നു ഹൈക്കോടതി പോലീസിനോട് ചോദിച്ചത്.

എന്നാല്‍ നിയമവ്യവസ്ഥയില്‍ നിന്ന് രക്ഷപ്പെട്ട പ്രതിയോട് യാതൊരു കരുണയും കാട്ടരുതെന്നായിരുന്നു പ്രോസിക്യൂഷന്‍ ആവശ്യപ്പെട്ടത്. ജാമ്യം നല്‍കരുതെന്ന് അതിജീവിതയും ആവശ്യപ്പെട്ടിരുന്നു.

Content Highlights: Vijay Babu, Bail, Flight Ticket, High Court