കസ്റ്റഡിയിലെടുത്ത യുവതിയെ ലൈംഗികമായി പീഡിപ്പിച്ചു; ഡിവൈഎസ്പി ഉമേഷിന് സസ്‌പെന്‍ഷന്‍

കസ്റ്റഡിയിലെടുത്ത യുവതിയെ ലൈംഗികമായി പീഡിപ്പിച്ചെന്ന പരാതിയില്‍ വടകര ഡിവൈഎസ്പി എ.ഉമേഷിനെ സസ്‌പെൻഡ് ചെയ്തിരിക്കുന്നു. പാലക്കാട് എസ് പി യുടെ റിപ്പോർട്ടിൽ, ഉമേഷ് പൊലീസ് ഉദ്യോഗസ്ഥനെന്ന പദവി ദുരുപയോഗം ചെയ്ത് പീഡിപ്പിച്ചെന്നാണ് പറയുന്നത്. ഡിജിപി ആഭ്യന്തര വകുപ്പിന് ഈ റിപ്പോർട്ട് കൈമാറിയിരുന്നു. അതിന് പിന്നാലെയാണ് ഉമേഷിനെതിരെ നടപടി ഉണ്ടാകുന്നത്.
കേസും വൈകാതെയുണ്ടാകും. ഉമേഷിനെതിരെ നടപടി ആവശ്യപ്പെട്ട് കോഴിക്കോട്ടെ കോണ്‍ഗ്രസ് നേതൃത്വവും രംഗത്ത് വന്നിട്ടുണ്ട്.

ചെര്‍പ്പുളശ്ശരി സിഐ ആയിരുന്ന ബിനുതോമസ് ജീവൻ ഒടുക്കും മുന്നേ എഴുതി വെച്ച കുറിപ്പിലാണ് വടകര ഡിവൈഎസ്പി ഉമേഷിനെതിരെ ഗുരുതര ആരോപണം വരുന്നത്. 2014 ല്‍ ഉമേഷ് വടക്കാഞ്ചേരി സിഐ ആയിരിക്കെ അനാശാസ്യത്തിന് പിടികൂടി യുവതിയെ കേസില്‍ നിന്ന് ഒഴിവാക്കാമെന്ന് പറഞ്ഞ് പീഡിപ്പിച്ചെന്നായിരുന്നു ആക്ഷേപം. ബിനു തോമസിൻറെ കുറിപ്പിലെ വിവരം പുറത്തു വന്നതിന് പിന്നാലെ പാലക്കാട് ക്രൈംബ്രാഞ്ച് യുവതിയുടെ മൊഴിയെടുക്കുകയും ചെയ്തു.

വീട്ടിലെത്തി ഉമേഷ് തന്നെ പീഡിപ്പിച്ചെന്ന് യുവതി മൊഴിയും നല്കിയിട്ടുണ്ട്. ഇതോടെയാണ് പാലക്കാട് എസ്പി തുടർ നടപടിയിലേക്ക് കടന്നത്. ഉമേഷിനെതിരായ ആരോപണം പദവിയുടെ ദുരുപയോഗമാണെന്ന് കാണിച്ച്കൊണ്ട് എസ് പി, ഡിജിപിക്ക് റിപ്പോർട്ട് നല്കി. ഡിവൈഎസ് പിക്കെതിരെ നടപടിയെടുക്കേണ്ടത് ആഭ്യന്തര വകുപ്പായതിനാല്‍ ഡി ജി പി ആഭ്യന്തര വകുപ്പിന് ഈ റിപ്പോർട്ട് കൈമാറുകയായിരുന്നു.