മദ്യപാനത്തിനിടെ തര്‍ക്കം; സഹോദരനെ വെട്ടിയ ശേഷം യുവാവ് ഷോക്കേറ്റ് മരിച്ചു

തിരുവല്ലയില്‍ സഹോദരനെ വെട്ടി ഓടി രക്ഷപ്പെടാന്‍ ശ്രമിച്ച യുവാവ് ഷോക്കേറ്റ് മരിച്ചു. പെരിങ്ങര ചിറയില്‍ വീട്ടില്‍ സന്തോഷ് (43)ആണ് മരിച്ചത്. മദ്യപിക്കുമ്പോഴുണ്ടായ തര്‍ക്കത്തെ തുടര്‍ന്ന് സഹോദരന്‍ സജീവിനെയാണ് (39) സന്തോഷ് വെട്ടി പരിക്കേല്‍പ്പിച്ചത്.

തലയ്ക്ക് വെട്ടേറ്റ സജീവിനെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. സംഭവം നടന്ന ഉടന്‍ ഓടിപ്പോയ സന്തോഷ് സമീപത്തുള്ള പഞ്ചായത്ത് ഓഫീസിന്റെ മതില്‍ ചാടിക്കടക്കവേ മതിലിനോട് ചേര്‍ന്നുള്ള എര്‍ത്ത് കമ്പിയില്‍ തട്ടി ഷോക്കേല്‍ക്കുകയായിരുന്നു.

കനത്ത മഴയെ തുടര്‍ന്ന് പഞ്ചായത്ത് പരിസരം മുഴുവന്‍ വെള്ളക്കെട്ടിലായിരുന്നു, വെള്ളത്തില്‍ വീണു കിടക്കുന്ന നിലയിലാണ് സന്തോഷിനെ കണ്ടെത്തിയത്.

Content Highlights – Young man died of shock after cut and injured his brother