അതിരുകടന്ന് സുഹൃത്തുക്കൾ തമ്മിലുള്ള തമാശ; മലദ്വാരത്തിലൂടെ കാറ്റടിച്ചു കയറ്റി 16കാരന് ദാരുണാന്ത്യം

അഹമ്മദാബാദിൽ സുഹൃത്തിന്റെ അതിരുകടന്ന തമാശയിൽ 16കാരന് ദാരുണാന്ത്യം. മലദ്വാരത്തിലൂടെ കാറ്റടിച്ച് കയറ്റിയറ്റിയതോടെ ആന്തരികാവയവങ്ങള്‍ തകര്‍ന്നാണ് 16കാരന് മരണമടഞ്ഞത്. ഗുജറാത്തിലെ കാദി താലൂക്കിലെ അലോക് ഇന്‍ഡസ്ട്രി പരിസരത്ത് വ്യാഴാഴ്ചയായിരുന്നു സംഭവം നടന്നത്.

എയര്‍ കംപ്രസര്‍ പൈപ്പ് മലദ്വാരത്തില്‍ തിരുകി കാറ്റടിച്ചത്തോടെ 16കാരന്‍ അബോധാവസ്ഥയിലാവുകയായിരുന്നു. ഉടൻ സമീപത്തെ ആശുപത്രിയിലെത്തിച്ചെങ്കിലും കുട്ടിയുടെ ജീവന്‍ രക്ഷിക്കാന്‍ സാധിച്ചില്ല. ശക്തിയായി കാറ്റടിച്ചതിനെ തുടര്‍ന്ന് ആന്തരികാവയവങ്ങള്‍ക്ക് ഗുരുതര ക്ഷതം സംഭവിച്ചതാണ് മരണകാരണമെന്ന് ആശുപത്രി അധികൃതർ പറഞ്ഞു. സുഹൃത്ത് കുല്‍ദീപ് വിജയ്ഭായിയെ പൊലീസ് അറസ്റ്റ് ചെയ്തു.

അലോക് ഇന്‍ഡസ്ട്രീസിലെ വുഡ് വര്‍ക് വിഭാഗത്തിൽ ജോലി ചെയ്തിരുന്ന മരിച്ച 16കാരന്‍ യു.പി സ്വദേശിയാണ്. ദേഹത്ത് പറ്റിയ മരപ്പൊടി ഒഴിവാക്കുന്നതിനായി ജോലിക്കാര്‍ സക്ഷന്‍ പമ്പ് ഉപയോഗിച്ചിരുന്നതായി കോണ്‍ട്രാക്ടര്‍ പറഞ്ഞു.

കുല്‍ദീപും മരിച്ച യുവാവും പരസ്പരം എയര്‍ കംപ്രഷന്‍ പൈപ് ഉപയോഗിച്ച് കളിയാക്കുന്നത് ശ്രദ്ധയില്‍പെട്ടിരുന്നുവെന്നും മരിച്ച 16കാരന്‍ ആദ്യം എയര്‍ കംപ്രഷന്‍ പൈപ് കുല്‍ദീപിന്റെ സ്വകാര്യ ഭാഗത്ത് തിരുകുകയായിരുന്നുവെന്നും പിന്നീട് ഇയാള്‍ ഇത് തിരിച്ചുചെയ്തപ്പോളാണ് 16കാരന്‍ ബോധം നഷ്ടപ്പെട്ട് വീണതെന്നും കോണ്‍ട്രാക്ടര്‍ പറഞ്ഞു.