നടന്‍ വജ്ര സതീഷ് കുത്തേറ്റു മരിച്ച നിലയില്‍; ഭാര്യാസഹോദരന്‍ അറസ്റ്റില്‍

കന്നഡ നടന്‍ വജ്ര സതീഷ് കുത്തേറ്റു മരിച്ച നിലയില്‍. ബംഗളൂരു, ആര്‍ ആര്‍ നഗര്‍, പട്ടണഗരെയിലെ വീട്ടിലാണ് നടനെ മരിച്ച നിലയില്‍ കണ്ടെത്തിയത്. കഴുത്തിലും വയറ്റിലും ആഴത്തില്‍ കുത്തേറ്റ നിലയില്‍ കിടപ്പുമുറിയിലായിരുന്നു മൃതദേഹം. വാതിലിന് സമീപം രക്തം കണ്ട അയല്‍വാസികള്‍ അറിയിച്ചതനുസരിച്ച് പോലീസ് എത്തി വീട് തുറക്കുകയായിരുന്നു. സംഭവത്തില്‍ സതീഷിന്റെ ഭാര്യാസഹോദരന്‍ സുദര്‍ശനെയും മറ്റൊരാളെയും അറസ്റ്റ് ചെയ്തു.

സതീഷിന്റെ ഭാര്യ ഏഴു മാസം മുന്‍പ് മരിച്ചിരുന്നു. ഭാര്യയെ സതീഷ് ഉപദ്രവിക്കാറുണ്ടായിരുന്നെന്നും ഭാര്യയ്ക്ക് ചികിത്സ വൈകിയതാണ് മരണകാരണമെന്നും കുടുംബം നേരത്തേ ആരോപിച്ചിരുന്നു. ഇക്കാരണത്താല്‍ സതീഷിനെ സുദര്‍ശന്‍ കൊലപ്പെടുത്തുകയായിരുന്നെന്ന് പോലീസ് അറിയിച്ചു. ഭാര്യവീട്ടുകാര്‍ക്കൊപ്പമായിരുന്ന കുഞ്ഞിനെ വിട്ടുകിട്ടാന്‍ സതീഷ് കോടതിയെ സമീപിച്ചിരുന്നു. ഇതും കൊലയ്ക്ക് കാരണമായെന്നാണ് സൂചന.

സുഹൃത്തായ നാഗേന്ദ്രയ്ക്ക് ഒപ്പമെത്തിയാണ് സുദര്‍ശന്‍ കൊല നടത്തിയത്. കൃത്യത്തിന് ശേഷം വീടു പൂട്ടി ഇവര്‍ കടന്നു കളയുകയായിരുന്നു. ലഗോരി എന്ന ചിത്രമുള്‍പ്പെടെ ഏതാനും സിനിമകളില്‍ വജ്ര സതീഷ് അഭിനയിച്ചിട്ടുണ്ട്.

Content Highlights: Vajra Satheesh, Kannada Cinema, Murder