കെജിഎഫ് ഫെയിം അവിനാഷിന് വാഹനാപകടം; അത്ഭുതകരമായി രക്ഷപ്പെട്ടുവെന്ന് താരം

കെജിഫ് ഫെയിം ബി എസ് അവിനാഷിന്റെ കാര്‍ അപകടത്തില്‍പ്പെട്ടു. നടന്‍ സഞ്ചരിച്ചിരുന്ന കാര്‍ കണ്ടെയ്‌നര്‍ ലോറിയുമായി കൂട്ടിയിടിച്ചാണ് അപകടമുണ്ടായത്. അപകടത്തില്‍ നിന്നും താന്‍ അത്ഭുതകരമായി രക്ഷപ്പെട്ടെന്നും പരിക്കുകളൊന്നും പറ്റിയില്ലെന്നും നടന്‍ സമൂഹമാധ്യമങ്ങളിലൂടെ അറിയിച്ചു.

തന്റെ ജീവിതത്തിലെ ഏറ്റവും പേടിപ്പെടുത്തുന്ന അനുഭമായിരുന്നു ഈ അപകടമെന്നും അവിനാഷ് ഇന്‍സ്റ്റഗ്രാമില്‍ കുറിച്ചു. ബെംഗളൂരു അനില്‍ കുംബ്ലെ സര്‍ക്കിളിന് സമീപം രാവിലെ 6.05 നായിരുന്നു അപകടം ഉണ്ടായത്. കണ്ടെയ്നര്‍ ലോറി ഡ്രൈവറെ കബ്ബണ്‍ പാര്‍ക്ക് ട്രാഫിക് പോലീസ് കസ്റ്റഡിയിലെടുത്തു.

ഡ്രൈവര്‍ക്കെതിരെ ഇന്ത്യന്‍ ശിക്ഷാ നിയമത്തിലെ സെക്ഷന്‍ 279 പ്രകാരം പൊതുവഴിയില്‍ അശ്രദ്ധമായി വാഹനമോടിച്ചതിന് കേസെടുത്തതായും പോലീസ് അറിയിച്ചു.