വി ഡി സതീശനും സംഘപരിവാറും നേർക്കുനേർ; ”ആർ എസ് എസ് പരിപാടിയിൽ പങ്കെടുത്തിട്ടില്ലെന്ന് പറയുന്നത് പച്ചക്കള്ളം”- ആർ വി ബാബു

പ്രതിപക്ഷ നേതാവ് വി ഡി സതീശനും സംഘപരിവാറും തമ്മിൽ പോര് മുറുകുന്നു. സതീശനെതിരെ ആരോപണവുമായി ഹിന്ദു ഐക്യവേദി നേതാവ് ആര്‍ വി ബാബു വീണ്ടും രംഗത്തെത്ത്. വി ഡി സതീശൻ ആര്‍എസ്എസിനോട് വോട്ട് ചോദിച്ചുവെന്നാണ് ആരോപണം. 2001ലും 2006ലും സതീശൻ ആർഎസ്എസ് നേതാവിനെ രഹസ്യമായി കണ്ടിരുന്നുവെന്ന ആരോപണത്തിൽ ഉറച്ചു നിൽക്കുകയാണ് ഐ വി ബാബു.

പറവൂരിലെ ആർഎസ്എസ് പരിപാടിയിൽ പങ്കെടുത്തിട്ടില്ല എന്ന പ്രതിപക്ഷ നേതാവ് വി ഡി സതീശൻ്റെ വാദം തെറ്റെന്നാണ് ആർ വി ബാബു പറയുന്നത്. തന്‍റെ മോശം പശ്ചാത്തലം എന്താണെന്നു സതീശൻ പറയണം. സ്വപ്ന സുരേഷിന്‍റെയും, സരിതയുടെയും പശ്ചാത്തലം മനസിലാക്കിയാണോ സതീശൻ പ്രതികരിച്ചത് എന്നും ആര്‍ വി ബാബു ചോദിച്ചു.

വി ഡി സതീശന്‍ ആര്‍എസ്എസ് പരിപാടിയില്‍ പങ്കെടുക്കുന്ന ചിത്രം കളവാണെങ്കിൽ, നിയമ നടപടി സ്വീകരിക്കൂവെന്ന് ആർ വി ബാബു വെല്ലുവിളിച്ചു. സതീശൻ ആദർശത്തിൻ്റെ പൊയ്മുഖം അണിയുകയാണ്. പറവൂരിലെ ആര്‍എസ്എസ് പരിപാടിയിൽ ക്ഷണം സ്വീകരിച്ചെത്തിയ ആളാണ് സതീശൻ. ഒരു ഫ്യൂഡൽ മാടമ്പിയെ പോലെ അദ്ദേഹം സംവാദങ്ങളിൽ നിന്ന് പിന്മാറുന്നു. സതീശന്‍റെ സ്ഥാപിത താല്പര്യങ്ങളെ  എതിർത്തതോടെ സംഘപരിവാർ ശത്രുക്കളായെന്നും ബാബു കുറ്റപ്പെടുത്തി. രാഷ്ട്രീയം തുടങ്ങിയത് ആര്‍എസ്എസിനോട് പടവെട്ടിയെന്ന വി ഡി സതീശൻ്റെ പ്രസ്താവന പരിഹാസ്യമാണെന്നും ആർ വി ബാബു പറഞ്ഞു.

Content Highlights: R V Babu and V D Satheesan attend RSS function at Paravoor