റദ്ദാക്കിയത് 1,244 വിമാന സര്‍വീസുകള്‍; യാത്രക്കാരോട് ക്ഷമ ചോദിച്ച്‌ ദുബായ് എയര്‍പോര്‍ട്ട് സിഇഒയും എമിറേറ്റ്സും

കനത്ത മഴയെ തുടർന്ന് ദുബായ് വിമാനത്താവളത്തില്‍ യാത്രക്കാർക്കുണ്ടായ പ്രതിസന്ധിയില്‍ ക്ഷമ ചോദിച്ച്‌ വിമാനത്താവള സിഇഒയും എമിറേറ്റ്സ് എയർലൈൻസ് സിഇഒയും.

എമിറേററ്സ് എയർലൈൻസിന്റെ 400 ഓളം വിമാന സർവീസുകളാണ് മഴ കാരണം മുടങ്ങിയത്. ആദ്യ രണ്ട് ദിവസങ്ങളില്‍ ദുബായ് രാജ്യാന്തര വിമാനത്താവളത്തില്‍ 1,244 വിമാന സർവീസുകള്‍ റദ്ദാക്കിയിരുന്നു. നിലവില്‍ കാലാവസ്ഥ അനുകൂലമായ സാഹചര്യത്തില്‍ വിമാന സർവീസുകളെല്ലാം പുനഃസ്ഥാപിച്ചതായി എമിറേറ്റ്സ്, ഫ്ലൈ ദുബായ് അധികൃതർ അറിയിച്ചു.

യുഎഇയുടെ ചരിത്രത്തിലെ ഏറ്റവും വലിയ മഴയെ തുടർന്ന് ദുബായ് രാജ്യാന്തര വിമാനത്താവളത്തില്‍ യാത്രക്കാർക്കുണ്ടായ ബുദ്ധിമുട്ടില്‍ ഖേദം പ്രകടിപ്പിച്ച്‌ എയർപോർട്ട് സിഇഒ പോള്‍ ഗ്രിഫിത്സ് തുറന്ന കത്താണ് എഴുതിയത്. വിമാനത്താവളത്തിന്റെ പ്രവർത്തനം സാധാരണനിലയിലേയ്‌ക്ക് കൊണ്ടുവരുന്നതിനായി എല്ലാ ശ്രമങ്ങളും നടത്തിവരികയാണെന്ന് അദ്ദേഹം വിശദീകരിച്ചു.