തായ്‍ലാൻഡ് ഓപ്പണില്‍ സാത്വിക്-ചിരാഗ് സഖ്യത്തിന് കിരീടം

തായ്‍ലാൻഡ് ഓപ്പണ്‍ ബാഡ്മിന്റണ്‍ ചാമ്ബ്യൻഷിപ്പില്‍ ഇന്ത്യയുടെ സാത്വിക്സായിരാജ് രങ്കിറെഡ്ഡി, ചിരാഗ് ഷെട്ടി സഖ്യത്തിന് കിരീടം. ചൈനയുടെ ചെൻ ബോ യാങ്, ലിയു യി സഖ്യത്തേയാണ് ഇരുവരും ചേർന്ന് പരാജയപ്പെടുത്തിയത്. സ്കോർ: 21-15,21-15

ടോപ് സീഡായ ഇന്ത്യൻ സഖ്യത്തിന് സീഡില്ലാതെ ചൈനീസ് സഖ്യത്തില്‍ നിന്നും ആദ്യ ഗെയിമിന്റെ ആദ്യപകുതിയില്‍ വെല്ലുവിളി നേരിടേണ്ടി വന്നിരുന്നു. 10-11 എന്ന സ്കോറിന് പിന്നിട്ട് നിന്നതിന് ശേഷം മികച്ച പ്രകടനത്തിലൂടെ 21-15 എന്ന സ്കോറിന് ഏഷ്യൻ സ്വർണ്ണ മെഡല്‍ ജേതാക്കള്‍ ഗെയിം സ്വന്തമാക്കി.

രണ്ടാം ഗെയിമില്‍ ഇന്ത്യൻ സഖ്യത്തിനായിരുന്നു തുടക്കം മുതല്‍ ആധിപത്യം. ചിരാഗ് വരുത്തിയ ചില പിഴവുകളായിരുന്നു ചൈനീസ് സഖ്യത്തിന് പ്രതീക്ഷ നല്‍കിയെങ്കിലും ഗെയിമിലേക്ക് തിരിച്ചുവരാൻ അവർക്ക് കഴിഞ്ഞില്ല. പിഴവുകളൊന്നുമില്ലാതെ ഇൻഡ്യൻ സഖ്യം രണ്ടാം ഗെയിമും പൂർത്തിയാക്കി തായ്‍ലാൻഡ് ഓപ്പണിലെ രണ്ടാം കിരീടം സ്വന്തമാക്കി.