ഇന്ത്യന്‍ പ്രതീക്ഷകള്‍ അസ്ഥാനത്ത്; എഡ്ജ്ബാസ്റ്റണില്‍ ഇംഗ്ലണ്ടിന് റെക്കോര്‍ഡ് ജയം

ഇന്ത്യന്‍ ബൗളര്‍മാരില്‍ അര്‍പ്പിച്ച പ്രതീക്ഷകള്‍ ഫലം കണ്ടില്ല. എഡ്ജ്ബാസ്റ്റണില്‍ കട്ടക്ക് നിന്ന് ജോ റൂട്ടും ജോണി ബെയര്‍‌സ്റ്റോയും ഇംഗ്ലണ്ടിന് വിജയം സമ്മാനിച്ചു. 119 റണ്‍സെന്ന ലക്ഷ്യം സംരക്ഷിച്ചുകൊണ്ട് ഇന്ത്യന്‍ ബൗളിംഗ് നിര 7 ഇംഗ്ലിഷ് വിക്കറ്റ് അഞ്ചാം ദിനം വീഴ്ത്തുമെന്നായിരുന്നു ഇന്ത്യന്‍ ആരാധകരുടെ പ്രതീക്ഷ. എന്നാല്‍ നാലാം ദിനം നിര്‍ത്തിയിടത്തുനിന്ന് തുടങ്ങുകയായിരുന്നു ജോ – ബെയര്‍സ്‌റ്റോ കൂട്ടുകെട്ട്.

വിക്കറ്റ് നഷ്ട്ടപ്പെടാതെ തന്നെ ആക്രമിച്ചു കളിച്ചതാണ് ഇംഗ്ലണ്ടിന് അനായാസജയം ഒരുക്കിയത്. ജോ റൂട്ട് 142 റണ്‍സും ജോണി ബെയര്‍സ്‌റ്റോ 114 റണ്‍സും നേടി. ഇതോടെ അഞ്ചാം ദിനം 119 എന്ന വിജയലക്ഷ്യം വെറും 118 ബോളുകളിലാണ് ഇംഗ്ലീഷ് ബാറ്റര്‍മാര്‍ മറികടന്നത്. ടെസ്റ്റ് ക്രിക്കറ്റില്‍ ഇംഗ്ലണ്ട് പിന്തുടര്‍ന്നു നേടുന്ന ഏറ്റവും ഉയര്‍ന്ന സ്‌കോറെന്ന റെക്കോര്‍ഡും ഇതോടെ കുറിക്കപ്പെട്ടു.

അവസാന മത്സരത്തിലെ ഫലത്തോടെ 5 മത്സരങ്ങളുടെ പരമ്പര 2-2 സമനിലയില്‍ പിരിഞ്ഞു. അവസാന ടെസ്റ്റിലെ തോല്‍വിയുടെ ക്ഷീണം മാറ്റാന്‍ ഇന്ത്യക്ക് ഇനിയുമുണ്ട് അവസരങ്ങള്‍. ഇംഗ്ലണ്ടിനെതിരായ ട്വന്റി20, ഏകദിന മത്സരങ്ങള്‍ ആരംഭിക്കുകയാണ്. നാളെയാണ് ആദ്യ ട്വന്റി20. ടെസ്റ്റ് ടീമിലെ ആരും ആദ്യ ട്വന്റി20 മത്സരത്തില്‍ ഉണ്ടാവുകയില്ല.

Content Highlight: ENGvIND, India England Test, Edgbaston Test, 5th Test, India loss, England win