ബാഴ്സയെ വീഴ്ത്തി; ലാ ലീഗയിൽ അത്‍ലറ്റികോ ഒന്നാമത്
National Desk
Posted On December 22, 2024
സ്പാനിഷ് ഫുട്ബോൾ ലാ ലീഗയിൽ ബാഴ്സലോണയെ വീഴ്ത്തി അത്‍ലറ്റികോ ഡി മാഡ്രിഡ് പോയിന്റ് ടേബിളിൽ ഒന്നാമത് എത്തി. ഒന്നിനെതിരെ രണ്ട് ഗോളുകൾക്കാണ് അത്‍ലറ്റികോ ഡി മാഡ്രിഡിന്റെ വിജയം. മത്സരത്തിന്റെ 30-ാം മിനിറ്റിൽ ബാഴ്സ മുന്നിലെത്തി. പെഡ്രിയായിരുന്നു ഗോൾ നേടിയത്. ആദ്യ പകുതിയിൽ ഒരു ഗോളിന് മുന്നിൽ നിൽക്കാനും ബാഴ്സയ്ക്ക് കഴിഞ്ഞു.
എന്നാൽ രണ്ടാം പകുതിയിൽ അത്‍ലറ്റികോ ശക്തമായി തിരിച്ചുവന്നു. 60-ാം മിനിറ്റിൽ റോഡ്രിഗോ ഡി പോളിന്റെ ഗോളിലൂടെ അത്‍ലറ്റികോ സമനില പിടിച്ചു. പിന്നാലെ രണ്ടാം പകുതിയുടെ ഇഞ്ച്വറി ടൈമിൽ 96-ാം മിനിറ്റിലാണ് അത്‍ലറ്റികോയുടെ വിജയഗോൾ പിറന്നത്. അലെക്‌സാണ്ടര്‍ സൊര്‍ലോത്താണ് ഗോൾവല ചലിപ്പിച്ചത്.
ഈ വിജയത്തോടെ ലാ ലിഗ പോയിന്റ് ടേബിളിൽ ഒന്നാമതെത്താനും അത്‍ലറ്റികോ ഡി മാഡ്രിഡിന് കഴിഞ്ഞു. 18 മത്സരങ്ങളിൽ നിന്ന് 12 വിജയവും അഞ്ച് സമനിലയും ഒരു തോൽവിയും ഉൾപ്പെടെ 41 പോയിന്റാണ് അത്‍ലറ്റികോ സംഘത്തിന്റെ സമ്പാദ്യം. ബാഴ്സലോണ 38 പോയിന്റുമായി രണ്ടാം സ്ഥാനത്താണ്.
