കാനഡയിൽ ടിക് ടോക് താരം സ്‌കൈ ഡൈവിങ്ങിനിടെ മരിച്ചു

ഒന്റാറിയോയിൽ സ്‌കൈ ഡൈവിങ്ങിനിടെ ടിക് ടോക് താരത്തിന് ദാരുണാന്ത്യം. കാനഡയിലെ ഒന്റാറിയോയിലാണ് അപകടം നടന്നത്. പാരച്യൂട്ട് തുറക്കാന്‍ കഴിയാത്തതായിരുന്നു അപകടത്തിനു കാരണം. സാമൂഹ്യമാധ്യമങ്ങളില്‍ പത്തു ലക്ഷത്തിലധികം ആരാധാകരുള്ള തന്യാ പര്‍ദാസിയാണ് മരിച്ചത്. 21 വയസായിരുന്നു. ടൊറന്റോ സര്‍വകലാശാലയില്‍ തത്വശാസ്ത്ര വിദ്യാര്‍ത്ഥിയാണ് തന്യ. തന്യയുടെ ആദ്യ സ്‌കൈ ഡൈവിങ്ങിനിടെയാണ് അപകടം സംഭവിച്ചത്. ഒരാഴ്ചത്തെ പരിശീലനത്തിനു ശേഷം ഒറ്റയ്ക്കു സ്‌കൈ ഡൈവിങ് ചെയ്യുകയായിരുന്നു.

വേഗത്തില്‍ കറങ്ങിക്കൊണ്ടിരിക്കുകയായിരുന്ന പാരച്യൂട്ട് ഉയരം കുറഞ്ഞ പ്രദേശത്ത് വെച്ച് തുറക്കാന്‍ കഴിഞ്ഞില്ല. സാങ്കേതിക തകരാര്‍ ഒന്നും പാരച്യൂട്ടിന് ഉണ്ടായിരുന്നില്ലെന്നും പാരച്യൂട്ട് തുറക്കാന്‍ കഴിയാതെ പോയതിന്റെ കാരണം വ്യക്തമല്ലെന്നും ടൊറന്റോയിലെ സ്‌കൈ ഡൈവ് കമ്മ്യൂണിറ്റി പറഞ്ഞു.

തന്യ 2017ലെ മിസ് കാനഡ സൗന്ദര്യ മത്സരത്തിലെ അവസാന ഘട്ട മത്സരാര്‍ത്ഥിയായിരുന്നു. അപകടത്തിനു തൊട്ടു മുമ്പ് ആദ്യമായി സോളോ സ്‌കൈ ഡൈവിങ് ചെയ്യുന്നതിന്റെ സന്തോഷം സോഷ്യൽ മീഡിയയിലൂടെ തന്യ പര്‍ദാസ് പങ്കുവെച്ചിരുന്നു.

content highlights – tiktok star, died, skydive canada