ഇടുക്കി സത്രം എയര്‍സ്ട്രിപ്പില്‍ ആദ്യമായി വിമാനമിറങ്ങി

ഇടുക്കിയില്‍ ആദ്യമായി വിമാനമിറങ്ങി. വണ്ടിപ്പെരിയാര്‍ സത്രം എയര്‍സ്ട്രിപ്പിലാണ് വിമാനം ലാന്‍ഡ് ചെയ്തത്. മുന്‍പ് രണ്ടു തവണ പരാജയപ്പെട്ടതിനു ശേഷമാണ് ഇന്ന് വിമാനമിറക്കാനായത്. എന്‍സിസി വിദ്യാര്‍ത്ഥികള്‍ക്ക് പരിശീലനം നല്‍കുന്നതിനു വേണ്ടിയാണ് വൈറസ് എസ്ഡബ്ല്യു80 എന്ന ചെറുവിമാനം എത്തിയത്. പൊതുമരാമത്ത് വകുപ്പാണ് എയര്‍സ്ട്രിപ്പ് നിര്‍മിച്ചത്.

കാലാക്രമേണ മെഡിക്കല്‍ എമര്‍ജന്‍സി, ടൂറിസം തുടങ്ങിയവയ്ക്കായി ഈ എയര്‍സ്ട്രിപ്പ് വികസിപ്പിച്ചെടുക്കുകയാണ് ലക്ഷ്യമെന്ന് മന്ത്രി റോഷി അഗസ്റ്റിന്‍ പറഞ്ഞു. ഹൈറേഞ്ചിനും ഇവിടുത്തെ ജനങ്ങള്‍ക്കും ഭാവിയില്‍ ഏറെ പ്രയോജനകരമാകുന്ന തരത്തിലാണ് ഈ എയര്‍ സ്ട്രിപ്പ് വിഭാവനം ചെയ്തിരിക്കുന്നതെന്നും മന്ത്രി കൂട്ടിച്ചേര്‍ത്തു.