അടുത്ത തെരഞ്ഞെടുപ്പിലും രാഹുല്‍ അമേത്തിയില്‍ മത്സരിക്കുമെന്ന് യു.പി കോണ്‍ഗ്രസ് അധ്യക്ഷന്‍

2024ലെ ലോക്‌സഭ തെരഞ്ഞെടുപ്പിൽ രാഹുല്‍ ഗാന്ധി ഉത്തര്‍പ്രദേശിലെ അമേത്തിയില്‍ മത്സരിക്കുമെന്ന് പി.സി.സി അധ്യക്ഷൻ അജയ് റായ്. പി.സി.സി പ്രസിഡന്റായി ചുമതലയേറ്റ ശേഷം മാധ്യമങ്ങളോട് സംസാരിക്കുകയായിരുന്നു അജയ് റായ്.

പ്രിയങ്ക ഗാന്ധി വരാണാസിയില്‍ മോദിക്കെതിരെ മത്സരിക്കാൻ തീരുമാനിച്ചാല്‍ എല്ലാ പ്രവര്‍ത്തകരും വിജയം ഉറപ്പുവരുത്താൻ രംഗത്തിറങ്ങുമെന്നും അദ്ദേഹം പറഞ്ഞു. 2019ല്‍ പ്രിയങ്ക വരാണസിയില്‍ മോദിക്കെതിരെ മത്സരിക്കുമെന്ന് പറഞ്ഞിരുന്നെങ്കിലും അവസാന നിമിഷം അജയ് റായിയെ സ്ഥാനാര്‍ഥിയാക്കുകയായിരുന്നു. പ്രിയങ്ക ഗാന്ധി അടുത്ത തെരഞ്ഞെടുപ്പില്‍ മത്സരിച്ചേക്കുമെന്ന് ഭര്‍ത്താവ് റോബര്‍ട്ട് വാദ്ര സൂചന നല്‍കിയതിന് പിന്നാലെയാണ് ഇപ്പോൾ അജയ് റായിയുടെ പ്രതികരണം.