ബിഹാറില്‍ ദുര്‍ഗാപൂജ പന്തലിനു നേരെ വെടിവെപ്പ്; നാല് പേര്‍ക്ക് പരിക്കേറ്റു

ഞായറാഴ്ച പുലർച്ചെ ബിഹാറിലെ അറായില്‍ ദുർഗാപൂജ പന്തലിനു നേരെയുണ്ടായ വെടിവെപ്പില്‍ നാല് പേർക്ക് പരിക്കേറ്റു.

രണ്ട് മോട്ടോർ സൈക്കിളുകളിലായി എത്തിയ അജ്ഞാതർ വെടിയുതിർത്ത ശേഷം ഓടി രക്ഷപ്പെടുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. സംഭവസ്ഥലത്ത് നിന്ന് രണ്ട് വെടിയുണ്ടകള്‍ പോലീസ് കണ്ടെടുത്തു.

അർമാൻ അൻസാരി (19), സുനില്‍ കുമാർ യാദവ് (26), റോഷൻ കുമാർ (25), സിപാഹി കുമാർ എന്നിവർക്കാണ് വെടിയേറ്റത്. ഇവരെ വിദഗ്ധ ചികില്‍സയ്ക്കായി സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ചു.

അടിവയറ്റില്‍ വെടിയേറ്റ രണ്ടുപേരെ ശസ്ത്രക്രിയയ്ക്ക് വിധേയമാക്കിയതായി ഡോ.വികാഷ് സിംഗ് പറഞ്ഞു. വെടിവെപ്പിനു പിന്നിലെ കാരണം ഇതുവരെ വ്യക്തമല്ല.