കിഴക്കമ്പലത്ത് പൂട്ടിയിട്ട വീട്ടില്‍ മോഷണം നടത്തിയ കേസിലെ പ്രതികൾ അറസ്റ്റിൽ

കിഴക്കമ്പലത്ത് വീട് കുത്തിത്തുറന്ന് മോഷണം നടത്തിയ കേസില്‍ പ്രതികളെ പിടികൂടി പൊലീസ്. നിരവധി മോഷണക്കേസുകളിലെ പ്രതിയായ ഷംസീർ ഉൾപ്പടെ രണ്ടുപേരെയാണ് പൊലീസ് അറസ്റ്റ് ചെയ്തത്.കണ്ണൂര്‍ പന്നിയൂര്‍ കാരക്കോടി പുതിയപുരയില്‍ ചപ്പന്റകത്ത് വീട്ടില്‍ ഷംസീര്‍ (40) കണ്ണൂര്‍, കാസര്‍കോട്, തൃശൂര്‍ എന്നീ ജില്ലകളിലെ വിവിധ പോലീസ് സ്റ്റേഷന്‍ പരിധിയിലെ നിരവധി മോഷണ കേസുകളിലെ പ്രതിയാണ്. തൃശൂര്‍ പുന്നയൂര്‍ പന്തായില്‍ വീട്ടില്‍ സനല്‍ (37) ആണ് ഷംസീറിനൊപ്പം അറസ്റ്റിലായത്.

കിഴക്കമ്പലം വായനശാലപ്പടി ഭാഗത്ത് പൂട്ടിയിട്ടിരുന്ന വീട്ടില്‍ നിന്ന് പത്തുപവനോളം വരുന്ന സ്വര്‍ണ്ണാഭരണങ്ങളാണ് മോഷണം പോയത്. വീടിന്റെ ഓടാമ്പല്‍ അറുത്തുമാറ്റിയാണ് പ്രതികള്‍ വീട്ടിനകത്ത് കയറി മോഷ്ടിച്ചത്. തിങ്കളാഴ്ചയാണ് സംഭവം നടന്നത്. തുടര്‍ന്ന് പ്രത്യേക അന്വേഷണസംഘം രൂപീകരിച്ച് തടിയിട്ട പറമ്പ് പൊലീസ് നടത്തിയ അന്വേഷണത്തിൽ കുന്നംകുളത്ത് നിന്നുമാണ് പ്രതികളെ പിടികൂടിയത്.

ഏഎസ്പി അനൂജ് പലിവാലിന്റെ നേതൃത്വത്തിലുള്ള അന്വേഷണ സംഘത്തില്‍ ഇന്‍സ്‌പെക്ടര്‍ വി.എം.കെഴ്‌സന്‍, സബ് ഇൻസ്പെക്ടർ രാജന്‍, സീനിയർ സിവിൽ പൊലീസ് ഓഫീസർമാരായ ഷമീര്‍, കരീം, അന്‍സാര്‍, ബിന്ദു, സിവിൽ പൊലീസ് ഓഫീസർമാരായ മാഹിൻ ഷാ, അരുൺ, കരുൺ, എന്നിവരാണ് ഉണ്ടായിരുന്നത്.

Content Highlight – Accused arrested in Robbery case in Kizhakkambalam