കൊച്ചിയില്‍ ബോട്ടുജെട്ടി തകര്‍ന്ന് 20 ഓളം യാത്രക്കാര്‍ കായലില്‍ വീണു

കൊച്ചിയില്‍ ബോട്ടുജെട്ടി തകര്‍ന്ന് യാത്രക്കാര്‍ കായലില്‍ വീണു. വില്ലിംഗ്ടണ്‍ ഐലന്‍ഡിലെ ടെര്‍മിനല്‍ ബോട്ടുജെട്ടിയുടെ ഭാഗമായ പാലമാണ് തകര്‍ന്നത്. വെള്ളിയാഴ്ച ഉച്ചയ്ക്ക് 2.30നാണ് സംഭവം. അപകടം നടക്കുമ്പോള്‍ സ്ത്രീകളും കുട്ടികളും അടക്കം 20ഓളം പേര്‍ പാലത്തില്‍ നില്‍ക്കുന്നുണ്ടായിരുന്നു. കായലിലെ ചെളിയിലേക്ക് വീണ ഇവരെ ജെട്ടിയിലുണ്ടായിരുന്ന ബോട്ടിലെ ജീവനക്കാര്‍ രക്ഷപ്പെടുത്തുകയായിരുന്നു.

ആന്ധ്രാപ്രദേശില്‍ നിന്നെത്തിയ വിനോദസഞ്ചാരികളാണ് അപകടത്തില്‍ പെട്ടത്. വില്ലിംഗ്ടണ്‍ ഐലന്‍ഡ് സന്ദര്‍ശിച്ച ശേഷം മടങ്ങിപ്പോകുന്നതിനായി ഇവരെത്തിയ ടൂറിസ്റ്റ് ബോട്ട് കാത്തു നില്‍ക്കുന്നതിനിടെയാണ് അപകടം. ജലഗതാഗത വകുപ്പിന്റെ സര്‍വീസ് ബോട്ടുകള്‍ക്കായുള്ള ജെട്ടിയാണ് ഇത്. കപ്പല്‍ചാലിനോട് ചേര്‍ന്നു നില്‍ക്കുന്ന ഇവിടെ ആഴമുള്ള ഭാഗമാണ്.

2.40ന് പുറപ്പെടേണ്ട സര്‍വീസ് ബോട്ടിലെ ജീവനക്കാരാണ് യാത്രക്കാരുടെ രക്ഷകരായത്. ഇവരുടെ സമയോചിതമായ ഇടപെടല്‍ ഇല്ലായിരുന്നെങ്കില്‍ അപകടം ദുരന്തത്തില്‍ കലാശിക്കുമായിരുന്നു.

Content Highlight: Boat jetty collapsed in kochi