മാരക മയക്കുമരുന്ന് വില്‍പന നടത്താന്‍ ശ്രമിച്ചയാൾ അറസ്റ്റിൽ

മാരക മയക്കുമരുന്ന് വില്‍പന നടത്താന്‍ ശ്രമിച്ചയാളെ അറസ്റ്റ് ചെയ്ത് പൊലീസ്. ചാലയ്ക്കല്‍ കുന്നംപിള്ളില്‍ വീട്ടില്‍ സിദ്ദിഖി(38)നെയാണ് ആലുവ പോലീസ് പിടികൂടിയത്. ഇയാളിൽ നിന്നും പത്ത് ഗ്രാം ഹാഷിഷ് ഓയിലും നൈട്രോസിപാം ഗുളികകളും കണ്ടെത്തി.

വ്യാഴാഴ്ച രാത്രിയാണ് സംഭവം നടന്നത്. ആലുവ ഗവണ്‍മെന്റ് ആശുപത്രിക്ക് സമീപം സിദ്ദിഖ് സഞ്ചരിച്ചിരുന്ന കാറില്‍ നിന്നുമാണ് മയക്കുമരുന്ന് കണ്ടെടുത്തത്. പ്രവാസിയായിരുന്ന സിദ്ദിഖ് ചാലക്കലിൽ ലോണ്‍ട്രി ഷോപ്പ് നടത്തുകയാണ്. ഇയാളുടെ സ്ഥാപനത്തിൽ നടത്തിയ പരിശോധനയിൽ മയക്കുമരുന്ന് തൂക്കാന്‍ ഉപയോഗിക്കുന്ന ഡിജിറ്റല്‍ ത്രാസ്, നിറയ്ക്കാനുപയോഗിക്കുന്ന ചെറിയ കുപ്പികള്‍ എന്നിവ പൊലീസ് കണ്ടെടുത്തു.

എസ്.എച്ച്.ഒ എല്‍ അനില്‍ കുമാര്‍, എസ്.ഐമാരായ എം.എസ്.ഷെറി, ജോയി മത്തായി സി.പി. ഒ മാരായ മാഹിന്‍ ഷാ അബൂബക്കര്‍, മുഹമ്മദ് അമീര്‍, നിയാസ് എന്നിവര്‍ ചേര്‍ന്നാണ് ഇയാളെ പിടികൂടിയത്.

Content Highlight – Man arrested for trying to sell deadly drugs