ബംഗാളില്‍ ട്രെയിനുകള്‍ കൂട്ടിയിടിച്ചു; 5 മരണം, നിരവധി പേര്‍ക്ക് പരുക്ക്

ബംഗാളില്‍ കാഞ്ചൻജംഗ എക്സ്പ്രസ് ഗുഡ്സ് ട്രെയിനുമായി കൂട്ടിയിടിച്ചു. അപകടത്തില്‍ അഞ്ച് മരണമെന്നാണ് ആദ്യ വാര്‍ത്തകള്‍.

ഒട്ടേറെ യാത്രക്കാർക്ക് പരുക്കേറ്റതായാണ് വിവരം. ഡാർജിലിങ് ജില്ലയിലാണ് അപകടം. കൂടുതല്‍ വിവരങ്ങള്‍ പുറത്തുവന്നിട്ടില്ല. അപകടം ഞെട്ടിക്കുന്നതാണെന്ന് ബംഗാള്‍ മുഖ്യമന്ത്രി മമത ബാനർജി പറഞ്ഞു. സംഭവസ്ഥലത്തേക്ക് ഉടൻ എത്താൻ ഡോക്ടർമാർക്കും ദുരന്തനിവാരണ സംഘങ്ങള്‍ക്കും നിർദേശം നല്‍കിയതായും മമത പറഞ്ഞു.

അസമിലെ സില്‍ചാറില്‍നിന്ന് കൊല്‍ക്കത്തയിലെ സീല്‍ദാഹിലേക്ക് പോകുന്ന കാഞ്ചൻജംഗ എക്സ്പ്രസ് രംഗപാണി സ്റ്റേഷൻ പിന്നിട്ടതിനു പിന്നാലെയാണ് ഗുഡ്സ് ട്രെയിന്‍ പിന്നില്‍ ഇടിച്ചത്. അപകടത്തില്‍ കാഞ്ചൻജംഗയുടെ രണ്ട് കോച്ചുകളും ഗുഡ്സ് ട്രെയിനിന്റെ ഏതാനും ബോഗികളും പാളം തെറ്റിയിട്ടുണ്ട്.