മോഷ്ടാവിന്റെ മരണം ; കൊലപാതകം എന്ന് പോസ്റ്റുമാർട്ടം റിപ്പോർട്ട്

ഇടുക്കി ഉടുമ്പൻചോലക്ക് സമീപം രാജേന്ദ്രന്റെ വീട്ടിൽ എത്തിയ മോഷ്ടാവ് എന്ന് സംശയിക്കുന്നയാളുടെ മരണം കൊലപാതകമെന്ന് പോസ്റ്റ്മോർട്ടം റിപ്പോർട്ട്. സംഭവത്തിൽ വീട്ടുടമസ്ഥൻ രാജേന്ദ്രൻ അറസ്റ്റിൽ.
മോഷണ ശ്രമത്തിനിടെ വീട്ടുടമസ്ഥൻ രാജേന്ദ്രനുമായുള്ള മൽപ്പിടുത്തത്തിനിടെ കഴുത്തിൽ മുറുക്കിപ്പിടിച്ച് ശ്വാസം മുട്ടിയാണ് ജോസഫ് മരിച്ചതെന്നാണ് പൊലീസ് പറയുന്നത്.

ചൊവ്വാഴ്ച്ച പുലർച്ചെയാണ് സംഭവം. വീടിന്റെ പിൻഭാഗം കുത്തിത്തുറന്ന് അകത്തുകയറി മുറിക്കുള്ളിലെ അലമാര കുത്തി തുറക്കാൻ ശ്രമിക്കുകയായിരുന്നു ജോസഫെന്നും. ശബ്ദം കേട്ട് ഉണർന്ന രാജേന്ദ്രൻ ജോസഫുമായി മൽപ്പിടുത്തമുണ്ടായി എന്നുമാണ് പറയുന്നത്. ഉന്തും തള്ളും നടക്കുന്നതിനിടയിൽ രാജേന്ദ്രന്റെ കൈമടക്കിനുള്ളിൽ അകപ്പെട്ട് കഴുത്തിലെ എല്ലുകൾ പൊട്ടി ശ്വാസതടസമുണ്ടായി എന്നും ഇത് മരണകാരണമായി എന്നുമാണ് പോസ്റ്റ്മോർട്ടം റിപ്പോർട്ട്. മോഷ്ടാവ് ധരിച്ചിരുന്ന കോട്ടുപയോഗിച്ച് കൈകൾ പിന്നിലേക്ക് കെട്ടാനും രാജേന്ദ്രന്റെ ഭാഗത്ത് നിന്ന് ശ്രമം ഉണ്ടായി.

മോഷ്ടാവിന്റെ ആക്രമണത്തിൽ രാജേന്ദ്രന്റെ മുഖത്തിനു പരിക്കേറ്റിരുന്നു. രാജേന്ദ്രൻ ശബ്ദം ഉണ്ടാക്കി അയൽവാസികളെ വിവരമറിയിക്കുകയായിരുന്നു.

Content Highlights – Death during theft attempt