പൊലീസ് വന്നിരുന്നെങ്കില്‍ കള്ളപ്പണം കിട്ടിയേനെ; വിമര്‍ശനവുമായി മന്ത്രി ഗണേശ് കുമാര്‍

കോണ്‍ഗ്രസ് നേതാക്കള്‍ ഹോട്ടലില്‍ കള്ളപ്പണം കൊണ്ടുവന്നുവെന്ന ആരോപണത്തില്‍ പൊലീസിനെ പരോക്ഷമായി വിമർശിച്ച്‌ ഗതാഗത മന്ത്രി കെ ബി ഗണേശ് കുമാർ.

ഹോട്ടലിലേക്ക് പൊലീസ് നേരത്തെ എത്തിയിരുന്നെങ്കില്‍ കളളപ്പണം കണ്ടെത്താമായിരുന്നുവെന്ന് അദ്ദേഹം പറഞ്ഞു. ഒരു മാദ്ധ്യമത്തിന് നല്‍കിയ അഭിമുഖത്തില്‍ സംസാരിക്കുകയായിരുന്നു മന്ത്രി.

‘തിരഞ്ഞെടുപ്പ് കമ്മീഷനാണ് ഇപ്പോള്‍ എല്ലാത്തിന്റെയും നിയന്ത്രണം. ഒരു മുഖ്യമന്ത്രിക്കോ മന്ത്രിക്കോ ഇടപെടാവുന്ന വിഷയമല്ല ഇത്. വിവരം കിട്ടിയാല്‍ പരിശോധിക്കും. അത് തിരഞ്ഞെടുപ്പ് കമ്മീഷന്റെ സിസ്റ്റമാണ്. സർക്കാരാണ് പൊലീസിനെ വിട്ടതെന്നൊന്നും പറയരുത്. അങ്ങനെ തെറ്റിദ്ധരിപ്പിക്കരുത്.

ഇത്തരമൊരു വിവരം കിട്ടിയാല്‍ തിരഞ്ഞെടുപ്പ് സമയത്ത് പൊലീസിന് എവിടെയും കയറി പരിശോധിക്കാം. ആരുടെ വണ്ടിയും തടഞ്ഞുനിർത്താം. ഞാൻ സ്ഥാനാർത്ഥിയായിരുന്നപ്പോള്‍ എന്റെ വണ്ടിയും തടഞ്ഞുനിർത്തിയിട്ടുണ്ട്. പൊലീസ് കുറച്ച്‌ കൂടെ നേരത്തെ വന്നിരുന്നെങ്കില്‍, എല്ലാ മുറിയും പരിശോധിച്ചിരുന്നെങ്കില്‍ പണം കിട്ടുമായിരുന്നെന്നാണ് എന്റെ അഭിപ്രായം.

ഒരു അഭിനേതാവ് എന്ന നിലയില്‍ ഞാൻ പറയാം. ഒഴിഞ്ഞ കപ്പില്‍ വെള്ളം കുടിക്കുന്നതും ചായയുള്ള കപ്പില്‍ കുടിക്കുന്നതും ദൂരെ നിന്ന് കണ്ടാല്‍ മനസിലാകും. ഭാരമുള്ള പെട്ടി കൊണ്ടുപോകുന്നതും ഭാരമില്ലാത്ത പെട്ടി ഉരുട്ടിക്കൊണ്ടുപോകുമ്ബോഴുമുള്ള വ്യത്യാസം ശ്രദ്ധിച്ചുനോക്കിയാല്‍ ആ വീഡിയോയില്‍ നിന്ന് മനസിലാകും. അത് പണമായിരിക്കുമല്ലോ. അല്ലാതെ നനയ്ക്കാനുള്ള തുണിയുമായി വരുമോ.’- ഗണേഷ് കുമാർ ചോദിച്ചു.