തിരുവനന്തപുരത്ത് വൻ കഞ്ചാവ് വേട്ട; കാറില്‍ നിന്നും പിടിച്ചെടുത്തത് 80 കിലോ കഞ്ചാവ്; തമിഴ്‌നാട് സ്വദേശി പിടിയില്‍
National Desk
Posted On February 19, 2024
കല്ലമ്ബലം ആഴംകോണത്ത് കാറില്‍ കടത്താൻ ശ്രമിച്ച കഞ്ചാവുമായി യുവാവ് പിടിയില്‍. തമിഴ്‌നാട് സ്വദേശി ശങ്കറാണ് പിടിയിലായത്. ഇയാളുടെ പക്കല്‍ നിന്നും 80 കിലോ തൂക്കം വരുന്ന കഞ്ചാവ് പാക്കറ്റ് പിടിച്ചെടുത്തതായി എക്‌സൈസ് അറിയിച്ചു.
ഇയാള്‍ക്കൊപ്പമുണ്ടായിരുന്ന സുഹൃത്ത് ഓടി രക്ഷപ്പെട്ടു. ഇയാള്‍ക്കായുള്ള അന്വേഷണം നടത്തി വരികയാണ്. ഇന്നലെ വൈകിട്ട് ആറ് മണിയോടെയാണ് സംഭവം. കല്ലമ്ബലത്ത് എക്‌സൈസ് നടത്തിയ വാഹന പരിശോധനയ്‌ക്കിടെയാണ് പ്രതി പിടിയിലായത്. എക്‌സൈസ് ഉദ്യോഗസ്ഥർ കൈ കാണിച്ചപ്പോള്‍ യുവാവ് വാഹനം നിർത്തിയെങ്കിലും ഇയാള്‍ക്കൊപ്പമുണ്ടായിരുന്ന സുഹൃത്ത് ഓടി രക്ഷപ്പെടുകയായിരുന്നു. ശങ്കറും രക്ഷപ്പെടാൻ ശ്രമിച്ചെങ്കിലും ഇയാളെ എക്‌സൈസ് ഉദ്യോഗസ്ഥർ പിടികൂടി. തുടർന്ന് നടത്തിയ പരിശോധനയിലാണ് വാഹനത്തില്‍ നിന്നും കഞ്ചാവ് പിടികൂടിയത്.
കാറില്‍ നിന്നും 32 പാക്കറ്റുകളിലായി സൂക്ഷിച്ചു വച്ചിരുന്ന കഞ്ചാവാണ് പിടികൂടിയത്. കാറില്‍ നിന്നും ഓടി രക്ഷപ്പെട്ട വ്യക്തിയുടെ പേരില്‍ നിരവധി കേസുകള്‍ തമിഴ്‌നാട് പോലീസ് രജിസ്റ്റർ ചെയ്തിട്ടുണ്ടെന്ന് എക്‌സൈസ് പറഞ്ഞു.
