വിദ്യാര്‍ഥിനിയുടെ പരാതിയില്‍ അധ്യാപകനെ പൊലീസ് ഇന്ന് ചോദ്യം ചെയ്യും

റിസര്‍ച്ച് ഗൈഡിനെതിരെ ഗവേഷക വിദ്യാര്‍ഥിനി നല്‍കിയ പരാതിയില്‍ അധ്യാപകനെ ഇന്ന് ചോദ്യം ചെയ്യും. രാവിലെ ഹാജരാകാന്‍ മാവേലിക്കര പൊലീസ് നോട്ടീസ് നല്‍കിയിട്ടുണ്ട്. പരാതിക്കാരിയുടെ രഹസ്യമൊഴി രേഖപ്പെടുത്തും.

2020-2023 കാലയളവില്‍ ഗൈഡ് ലൈംഗിക ചുവയോടെ പെരുമാറിയെന്നും മോശമായ രീതിയില്‍ ശരീരത്തില്‍ കടന്നു പിടിച്ചെന്നും പരാതിയില്‍ പറയുന്നു. ഗൈഡിന്റെ മോശം പെരുമാറ്റത്തെ കുറിച്ച് പരാതിക്കാരി തന്നോടു നേരത്തെ പറഞ്ഞിട്ടുണ്ടെന്നു സഹപാഠിയും പൊലീസിൽ മൊഴി നല്‍കിയിട്ടുണ്ട്.
പൊലീസില്‍ പരാതി കൊടുത്തതിന്റെ പേരില്‍ പിഎച്ച് ഡി പഠനം തന്നെ ഇല്ലാതാക്കാന്‍ അധ്യാപകന്‍ ശ്രമിക്കുന്നതായും പരാതിയുണ്ട്. ലൈംഗിക ചുവയോടെ സംസാരിക്കുക, സ്ത്രീത്വത്തെ അപമാനിക്കുക തുടങ്ങിയ വകുപ്പുകള്‍ ചുമത്തിയാണ് എഫ് ഐ ആര്‍ രജിസ്റ്റര്‍ ചെയ്തിട്ടുള്ളത്.