തമിഴ്നാട്ടില്‍ വീണ്ടും രാഷ്ട്രീയ നേതാവ് കൊല്ലപ്പെട്ടു; എൻ.ടി.കെ നേതാവിനെ വെട്ടിക്കൊന്നു

ബി.എസ്.പി തമിഴ്നാട് അധ്യക്ഷൻ കെ. ആംസ്ട്രോങ് കൊല്ലപ്പെട്ട് ദിവസങ്ങള്‍ക്കുശേഷം തമിഴ്നാട്ടില്‍ വീണ്ടും രാഷ്ട്രീയ നേതാവ് കൊല്ലപ്പെട്ടു.

നാം തമിഴർ കക്ഷിയുടെ cr മധുര നോർത്ത് ജില്ല ഡെപ്യൂട്ടി സെക്രട്ടറി ബാലസുബ്രഹ്മണ്യനെ വെട്ടിക്കൊല്ലുകയായിരുന്നു. ചൊവ്വാഴ്ച രാവിലെയാണ് കൊലപാതകമെന്ന് പൊലീസ് അറിയിച്ചു.

പ്രഭാത നടത്തത്തിന് പോയപ്പോഴാണ് കൊലപാതകം. അക്രമികള്‍ പിന്തുടർന്ന് എത്തുന്നത് കണ്ട് രക്ഷപ്പെടാൻ ശ്രമിച്ചെങ്കിലും സാധിച്ചില്ല. നാലംഗ സംഘം റോഡിലിട്ട് വെട്ടിക്കൊല്ലുകയായിരുന്നു. മൃതദേഹം പോസ്റ്റുമോർട്ടത്തിനായി മാറ്റി.

അന്വേഷണം നടക്കുകയാണെന്നും ഉടൻ എഫ്.ഐ.ആർ ഫയല്‍ ചെയ്യുമെന്നും മധുര സിറ്റി പോലീസ് കമ്മീഷണർ ലോകനാഥൻ പറഞ്ഞു. ബാലസുബ്രഹ്മണ്യനെതിരെ മൂന്ന് ക്രിമിനല്‍ കേസുകള്‍ നിലവിലുണ്ട്. കുടുംബപ്രശ്നങ്ങളും വ്യക്തിവൈരാഗ്യവുമാണ് കൊലപാതകത്തിന് കാരണമെന്ന് സൂചന ലഭിച്ചതായാണ് പൊലീസ് പറയുന്നത്.