മദ്യപാനത്തിനിടെ വാക് തർക്കം; കൂട്ടുകാരനെ കല്ലുകൊണ്ട് കുത്തിക്കൊന്നു

തൊടുപുഴക്കടുത്ത് ഒളമറ്റത്ത് വാക് തർക്കത്തിനെ തുടർന്ന് സുഹൃത്തിനെ കല്ലുകൊണ്ട് തലക്ക് കുത്തി കൊലപ്പെടുത്തി യുവാവ്. ഒളമറ്റം സ്വദേശി മുണ്ടക്കൽ മജുവാണ് മരിച്ചത്. മജുവിന്റെ സുഹൃത്തും ഒളമറ്റം സ്വദേശിയുമായ നോബിൾ തോമസിനെ പൊലീസ് അറസ്റ്റ് ചെയ്തു. ഇരുവരും തമ്മിലുണ്ടായ വാക്കേറ്റം കൊലപാതകത്തിൽ കലാശിക്കുകയായിരുന്നു.

വാക് തർക്കത്തിനൊടുവിൽ പ്രകോപിതനായ നോബിൾ തോമസ് അടുത്തുണ്ടായിരുന്ന കല്ലെടുത്ത് മജുവിന്റെ തലക്ക് കുത്തുകയായിരുന്നു. രണ്ടു പേരും കഴിഞ്ഞ ദിവസം രാത്രിയിൽ ഒരുമിച്ചിരുന്ന് മദ്യപിച്ചിരുന്നു. മദ്യപാനത്തിനിടെയാണ് തർക്കമുണ്ടായത്. മജു സ്ഥിരമായി തന്നെ മർദിക്കാറുണ്ടായിരുന്നുവെന്ന് പിടിയിലായ നോബിൾ പൊലീസിനോട് പറഞ്ഞു. തിരിച്ചടിച്ചതിന്റെ ദേഷ്യത്തിൽ തന്നെ കൊലപ്പെടുത്തുമോ എന്ന പേടിയിലാണ് കല്ലെടുത്ത് തലക്കടിച്ചത് എന്നാണ് നോബിൾ പറയുന്നത്.

നോബിൾ തോമസിനെ തൊടുപുഴ പൊലീസ് കസ്റ്റഡിയിലെടുത്തു. മജുവിന്റെ മൃതദേഹം തൊടുപുഴ താലൂക്കാശുപത്രിയിലാണ്. പോസ്റ്റ്മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുകൊടുക്കും.

Content Highlights :Thodupuza Murder man hits his friend