ലോക്‌സഭാ തിരഞ്ഞെടുപ്പ് 2024: ആറാം ഘട്ട വോട്ടെടുപ്പ് ഇന്ന്

ലോക്‌സഭാ തിരഞ്ഞെടുപ്പിന്റെ ആറാം ഘട്ട വോട്ടെടുപ്പ് ഇന്ന്. 58 മണ്ഡലങ്ങളിലെ 889 സ്ഥാനാര്‍ത്ഥികളാണ് ജനവിധി തേടുന്നത്.

2019 ലെ വിജയം ആവര്‍ത്തിക്കാമെന്ന് ബിജെപിയും മണ്ഡലങ്ങള്‍ തിരിച്ച്‌ പിടിച്ചെടുക്കാമെന്ന് ഇന്‍ഡ്യ സഖ്യവും കണക്ക് കൂട്ടുന്നു. ഉത്തരേന്ത്യയിലെ കനത്ത ചൂട് പോളിങ് ശതമാനത്തെ ബാധിക്കുമോ എന്ന ആശങ്കയിലാണ് പാര്‍ട്ടികള്‍. ആറാം ഘട്ട വോട്ടെടുപ്പില്‍ 11.13 കോടി വോട്ടര്‍മാരാണ് ജനവിധി എഴുതുന്നത്. 5.84 പുരുഷ വോട്ടര്‍മാരും 5.29 സ്ത്രീ വോട്ടര്‍മാരും ഇതില്‍ ഉള്‍പ്പെടുന്നു. സംസ്ഥാനങ്ങളും കേന്ദ്ര ഭരണ പ്രദേശങ്ങളും അടക്കം 8 ഇടത്തെ 58 മണ്ഡലങ്ങളിലാണ് തിരഞ്ഞെടുപ്പ്.

കഴിഞ്ഞതവണ 58ല്‍ 53 സീറ്റില്‍ മല്‍സരിച്ച ബിജെപി നാല്‍പ്പതിടത്താണ് വിജയിച്ചത്. 44 സീറ്റില്‍ മല്‍സരിച്ച കോണ്‍ഗ്രസിന് ഒരൊറ്റ സീറ്റിലും വിജയം നേടാനായില്ല. അതുകൊണ്ട് നഷ്ടപ്പെടാനുള്ളത് ബിജെപിക്കും, എന്തുകിട്ടിയാലും നേട്ടം ഇന്‍ഡ്യ സഖ്യത്തിനുമാണ്. മുഴുവന്‍ സീറ്റുകളിലും മത്സരം നടക്കുന്ന ഡല്‍ഹി, ഹരിയാന സംസ്ഥാനങ്ങളില്‍ അരവിന്ദ് കെജ്‌രിവാളിന്റെ മടങ്ങി വരവും കര്‍ഷക പ്രശ്‌നങ്ങളും തുണക്കുമെന്നാണ് ഇന്ത്യ സഖ്യത്തിന്റെ കണക്ക് കൂട്ടല്‍.