രാഹുല്‍ രാഷ്ട്രീയ നേട്ടത്തിനു വേണ്ടി സവര്‍ക്കറുടെ പേര് ദുരുപയോഗം ചെയ്യുന്നു: രഞ്ജിത് സവര്‍ക്കര്‍

രാഹുല്‍ ഗാന്ധി രാഷ്ട്രീയ നേട്ടത്തിനു വേണ്ടി സവർക്കറുടെ പേര് ദുരുപയോഗം ചെയ്യുകയാണെന്ന് സവർക്കറുടെ കൊച്ചുമകൻ രഞ്ജിത് സവർക്കർ.

ഇത് കോണ്‍ഗ്രസിന്‍റെ ശീലമാണ്. സവർക്കറെ അപമാനിച്ചതിന് രാഹുല്‍ ഗാന്ധിയെ ചെരിപ്പുകൊണ്ട് അടിക്കണമെന്ന് 2019 ല്‍ ഉദ്ധവ് താക്കറെ പറഞ്ഞത് ഞാൻ ഓർക്കുന്നു.

അദ്ദേഹവും ഇന്ത്യൻ ബ്ലോക്കിലെ മറ്റ് നേതാക്കളും എന്‍റെ മുത്തച്ഛനെക്കുറിച്ച്‌ അശ്ലീലവും അപമാനകരവുമായ പരാമർശങ്ങള്‍ തുടരുകയാണ്. എന്നിരുന്നാലും, ഈ പ്രസ്താവനകളോടുള്ള പ്രതികരണം മഹാരാഷ്ട്രയില്‍ ഇതിനകം കണ്ടുകഴിഞ്ഞു. സംസ്ഥാനത്തെ ജനങ്ങള്‍ക്ക് കോണ്‍ഗ്രസിനോടുള്ള എതിർപ്പ് വർധിച്ചുവരികയാണെന്ന് അദ്ദേഹം പറഞ്ഞു.

സവർക്കർക്കെതിരെ അനാദരവും നിന്ദ്യവുമായ പരാമർശങ്ങള്‍ രാഹുല്‍ തുടരുന്നുണ്ടെങ്കിലും, 2019 ല്‍ രാഹുലിനെ ചെരുപ്പ് കൊണ്ട് അടിക്കണമെന്ന് പറഞ്ഞ ഉദ്ധവ് താക്കറെ ഇപ്പോള്‍ അദ്ദേഹത്തോടൊപ്പം നില്‍ക്കുകയാണെന്നും രഞ്ജിത് കുറ്റപ്പെടുത്തി.