ഇത്രയും മോശം തിരഞ്ഞെടുപ്പ് നടന്നിട്ടില്ല, സുതാര്യമല്ല; തിരഞ്ഞെടുപ്പ് കമ്മീഷന് പരാതിയുമായി സതീശന്‍

സംസ്ഥാനത്ത് സുതാര്യവും നീതിപൂര്‍വകവുമായ വോട്ടെടുപ്പ് നടന്നില്ലെന്ന് പ്രതിപക്ഷ നേതാവ് വിഡി സതീശന്‍.

തിരഞ്ഞെടുപ്പ് നടത്തിപ്പിലുണ്ടായ ഗുരുതര വീഴ്ച്ചകളെ കുറിച്ച്‌ അന്വേഷണം വേണമെന്ന് ആവശ്യപ്പെട്ട് വിഡി സതീശന്‍ കേന്ദ്ര തിരഞ്ഞെടുപ്പ് കമ്മീഷന് പരാതി നല്‍കി. പല ബൂത്തുകളിലും പോളിംഗ് വൈകിയാണ് നടന്നത്.

കനത്ത ചൂടില്‍ മണിക്കൂറുകളോളം കാത്തുനിന്നിട്ടും വോട്ട് ചെയ്യാനാവാതെ നിരവധി പേരാണ് മടങ്ങിയത്. ആറ് മണിക്ക് മുമ്ബ് ബൂത്തിലെത്തിയ നിരവധി പേര്‍ക്ക് വോട്ട് ചെയ്യാനാവാത്ത സാഹചര്യവും പല സ്ഥലങ്ങളിലുമുണ്ടായി.

തിരഞ്ഞെടുപ്പിനെ രൂക്ഷമായിട്ടാണ് സതീശന്‍ വിമര്‍ശിച്ചത്. സംസ്ഥാനത്ത് ഇത്രയും മോശമായ രീതിയില്‍ തിരഞ്ഞെടുപ്പ് നടന്നിട്ടില്ല. ഇരട്ട വോട്ടുകളും മരണപ്പെട്ടവരുടെ വോട്ടുകളും ഒഴിവാക്കി വോട്ടേഴ്‌സ് ലിസ്റ്റ് പരിഷ്‌കരിക്കുന്നതില്‍ സംസ്ഥാന തിരഞ്ഞെടുപ്പ് കമ്മീഷന്‍ പരാജയപ്പെട്ടുവെന്നും പരാതിയില്‍ ഉന്നയിക്കുന്നു.